Mientras cu MPR ta investigando, awe coriente a bay no un, pero tres diferente biaha na Aruba

ORANJESTAD – Despues di algun dia di ‘sosiego’, awe e fenomeno di perdida di coriente na Aruba a bin bek duro, unda cu no uno sino tres biaha caba, coriente a bay. Tur esaki mientras cu e team di MPR di Washington ta na Aruba pa investiga e problemanan cu tabatin ultimo tres siman. “MPR ta na Aruba continuando nan investigacion, y e problema di corriente y e molester y daño cu e ta haci nos comunidad lo haya: Conclusion, resolucion y acción y solucion” ta loke e minister encarga Glenbert Croes a bisa Noticiacla awe. E ta spera cu pa e fin di siman aki, e grupo aki tin un relato di e motibo y e solucion. Ta logico cu no ta culpa di MPR cu e coriente a bay, pero si ta bon cu nan mes por a experencia esaki pa porta agilisa nan investigacion riba e problemanan. Tambe, ningun di e biahanan aki, tabata trata di problema di blaas. 

CORIENTE

E prome interupcion tabata awe mainta cuarto pa 10 ora cu clientenan den e area di Piedra Plat, Santa Cruz y vecindario a haya e mensahe di Elmar cu ‘dentro poco nos tey interumpi e suministro di coriente pa por eherce un trabou di reparacion urgente y rapido riba e hoogspanningslijn den e area’. Esaki tabata pa 10 minuut ora cu coriente a bin bek. Despues pa merdia 12’or net, Elmar a avisa cu den un parti di e area di Cas Ariba, Urataka, San Fuego y vecindario nan tabata confronta  un problema den e distribucion di coriente den e area aki.  A resulta cu e causa di e interupcion ta debi na un poste di coriente cu a kibra. Casi banda di 1’or a informa cu e trabou inicial lo dura 1 ora mas of menos pa haya coriente bek, pa 99% di esnan afecta y un grupo chikito, lo a dura 5 ora pa esaki keda cla. Algo despues di 4’or di awe tardi, un otro fayo di coriente. E biaha aki tabata trata clientenan den un parti di e area di Noord. Pa 4;25pm, Elmar a informa cu e areanan afecta tabata un parti di Seroe Janchi, Montaña, Boegoeroei, Kudawecha, Sabana Liber. E causa di e interupcion ta debi na un fayo riba un kabel subteraneo. Pa 4:45pm, e situacion a normalisa pa e clientenan aki. Asina tres biaha, den diferente bario, tabatin interupcion di coriente atrobe.