Corte: Lo trata caso pa Sevinger paga casi un miyon florin bek, despues cu apelacion Avestruz termina

ORANJESTAD – Huez dialuna mainta a determina cu e caso di expropiacion contra ex minister Benny Sevinger, ta keda trata despues cu Corte di Apelacion di e caso penal Avestruz keda trata y ricibi e sentencia. Esaki riba peticion di e abogado di Sevinger, mr David Kock. Fiscal di Ministerio Publico no a mustra obhecion pa esaki y a keda palabra cu partidonan lo topa otro dia 21 di oktober proximo den un otro session pro forma pa determina e progreso di e caso. Ta trata aki di un caso unda cu ta exigi pa Sevinger paga e suma di 941.000 florin bek, sino mester posiblemente sinta un castigo di prison. Abogado Kock dialuna a argumenta cu e suma mester keda disputa, mirando cu den corte di prome instancia, huez a bari mayoria di acusacion contra su cliente y a sentencie ‘solamente’ pa e parti di posibel malversacion di fondo di su fundacion Bon Curazon. Como tal e suma mester keda reduci considerablemente, si opta pa sigui cu e caso mes.