Caso Avestruz: Sussebeek lo a cumpra Sevinger cu regalo, a cambio di 11 tereno erfpacht

ORANJESTAD – Corte di Apelacion diahuebs mainta 9’or a continua cu tratamento di e caso Avestruz unda cu e sospechoso principal ta ex minister Benny Sevinger. E dianan aki e hueznan mes ta haciendo nan preguntanan directo na e sospechosonan. Awe mainta a toca e comerciante Pieter Sussebeek, y tambe Sevinger. Ambos a keda sentencia den Corte di prome instancia. Un di e hueznan durante algo mas cu 2 ora, a atende Sussebeek y Sevinger riba nan relacion cu otro, tanto e relacion personal como di trabou. Y un biaha mas, e huez no a ria durante su preguntanan pa e dos personanan aki. Tur esaki den presencia di e familiarnan di ambos sospechoso y nan respetivo abogado. 

SUSSEBEEK A CUMPRA SEVINGER CU REGALO A CAMBIO DI TERENO

E huez a cuminsa na recorda Sussebeek cu e ta wordo acusa di a ‘cumpra’ Sevinger tempo cu e tabata minister, a cambio di fabor den forma di otorgamento di opcion pa tereno erfpacht. Ademas a acusa Sussebeek cu e la ‘laba’ un suma di 1.3 miyon florin. 

AMISTAD Y E CONSECUENCIA DI ESAKI

Huez a inicia pa establece e tipo di relacion entre e dos personanan aki, ki forma esaki tabata, y con esaki por a influencia y resulta den e actonan castigabel cu ambos persona ta wordo acusa di dje aworaki. Mescos cu e prome caso, a establece cu Sussebeek ta un amigo bieu di Sevinger, y cu ora Sevinger a bira minister, a wordo pidi pa traha p’e como consehero. E relacion entre nan dos ta(bata) asina bon cu nan t(a) considera otro te hasta como ‘ruman’. Huez mas laat a cuestiona Sevinger pa e relacion aki cu siendo un asina bon amigo, si e ta haya corecto cu e la permiti tur e loke a sosode, di sosode. 

REGALONAN

Huez a enfoca riba 3 regalo particular, cu ta un hekwerk, machine di gymnastiek, y un sistema di irigacion. Tur cumpra cu placa di Sussebeek, pa Sevinger, como regalo. Asina por lo menos Ministerio Publico ta interpreta e tres ‘regalonan’ aki. E huez sistematicamente a repasa e proceso cu a pasa aden pa e tres objetonan aki. Documentacion presenta door di Huez ta mustra cu Sussebeek via un di su hopi negoshinan a paga 9 mil florin pa e hekwerk pa cas di Sevinger. Sussebeek tambe a sigura huez den corte cu Sevinger a pag’e bek. Ademas segun Sussebeek, ta Sevinger a pidie pa haci e pago e momento ey pe. Y como amigo, e la hacie.  Huez a cuestiona e pagonan bek, indicando cu e sumanan cu a intercambia man, no ta echt cuadra. P.e. si Sussebeek a paga 9 mil pa e hekwerk, Sevinger a paga 10 mil bek, y asina tin mas ‘iregularidad’ cu sumanan. Huez tambe a cuestiona e declaracionan di nan, ya cu e declaracionan no tabata consistente. Segun huez, awor Sussebeek a sigura cu e la regla e asuntonan pa Sevinger, pasobra Sevinger no por a hacie e momento ey ya cu e tabata druk como minister. Sinembargo durante interogacion anterior, Sussebeek a sigura cu Sevinger mes tabata regla su cosnan. “Con bin esaki tabata diferente?” e huez a puntra ambos. Y asina tabatin mas momento den corte, ora cu e huez tabata sinti diferencia den declaracion y tabata confronta e dos personanan, pa nan clarifica. “Mi no a haci nada diferente cu paga e cuenta. Sevinger mes a diseña e hekwerk, y e mes a regla su cosnan. Ami no tabatin mas asunto cu esey” Sussebeek a bisa. Huez a cuestiona esaki” Awel con bin awor bo ta haci declaracionan diferente?” e huez a sigui puntra. “ Mi ta haci hopi pago, y ta administracion ta regla esaki” Sussebeek a bisa den su defensa. Huez no a confia e cuenta y a sigui insisti:” Pero abo ta bisa cu bo a duna e placa. Ta asina hopi e ta sosode cu bo ta haya placa di Sevinger?” e huez a sigui bisa. Aki Sussebeek a bisa cu debi cu e ta pasa den asina hopi pago, ta dificil pa corda tur cos y cu pesey e la opta pa haci un investigacion pa clarifica tur cos. “A pidi pa haci un investigacion, pasobra(mi) tin yen di cos di haci. Mi no ta corda tur cos. Ta dificil pa mantene tipo di detayenan. Pesey mi a haci investigacion con esaki a bay y mi a presenta esaki na boso” Sussebeek a bisa riba e tema ey. 

SISTEMA DI IRIGACION DI FANTASTIC GARDENS

Un otro gesto cu Corte a considera como un ‘regalo’ a cambio di fabor politico, tabata e compra di un sistema di irigacion cumpra na Fantastic Gardens. Huez a puntra Sussebeek, si e no ta considera esaki un regalo pa Sevinger, door cu e la paga 25 mil florin pa esaki, den tres pago reparti di 18 mil florin, 3 mil florin y 4 mil florin. “Ki bo tin di bisa riba esaki?” e huez a puntra Sussebeek. “ Ta pagonan cu Sevinger a pidi mi haci p’e” Sussebeek a contesta huez.  Pero despues e cos a bira complica ora cu huez a tende e siguiente splicacion. Sevinger a pidi Sussebeek pa haci e pagonan pasobra e no por a sali di su cura pasobra tur dia tabatin hende ta su tras pa papia cu ne, ora cu e la bira minister. Como tal tabata dificil pa e of su casa sali pa haci e pagonan. Sevinger a splica e ora cu prome cu e tabata minister, e no tabatin cura dilanti su cas, pasobra e tabata kier pa hende wak su cas. Si e tabatin un muraya, esaki lo a tapa e (bunitesa di e) cas  y esey no tabata e idea. Pero ora cu e la bira minister, pa su proteccion a consehe pa e pone un cura y e ora e mester a pone e hekwerk ey. Pero e ora e asunto a bira interesante. Sussebeek a splica huez cu e casa di Sevinger a bin su cas cu e placa cash pa paga pa e hekwerk. Aki huez a cuestiona esaki: “Con bin bo casa a hiba e placa pa Sussebeek y no directamente pa Fantastic Gardens siendo cu bo cas ta mas cerca di Fantastic Gardens, cu esun di Sussebeek” e huez a puntra. Un biaha mas Sevinger a contesta cu su casa no por a sali di su cas. Aki huez a cuestiona e pensamento aki “ Pero si pa trece placa pa Sussebeek?” huez a puntra, indicando cu e storia di Sevinger no ta cuadra y no ta logico. Tanto e logica di bay ‘te’ cas di Sussebeek, siendo cu Fantastic Gardens tabata mas cerca, y cu mientras cu e casa no por sali pa otro cos, pa hiba placa si e no tin problema pa sali di e cas. E ora e huez a cuestiona Sussebeek su falta di conocemento di e detayenan y e cambio di e informacion. Aki Sussebeek a dicidi di conta su situacion di tempo cu e tabata deteni den KIA, y tur loke e mester a soporta pa asina e huez por a compronde. “Mi tabata den un cel cu dos otro hoben, cu henter dia tabata huma marihuana. Y un di nan tabatin asina un tatuahe grandi riba su lomba cu e texto ‘El sicario de los sicarios’” Sussebeek a bisa, indicando cu esey tabata dune hopi stress y pesey porta e no tabata corda cierto detayes of  cuenta ora cu a interogue e tempo ey. “Con bo kier mi corda tur e cosnan aki?” e la contesta e huez. 

 GYM EQUIPMENT

E huez a sigui e ultimo parti di e ‘regalonan’. Huez a confronta Sussebeek y Sevinger (un biaha mas) cu e hecho cu a haya un ekipo di gym na cas di Sevinger durante e entrada hudicial pa cu e cas algun tempo atras. E ekipo, a resulta, tabata paga pa compania di Sussebeek, pa un suma di 11 mil dollar. Mientras cu ta Sussebeek a cumpre, a sigura cu e oferta pa e ekipo tabata riba nomber di Sevinger.  Testigonan e siman aki ainda a confirma cu esaki a wordo cumpra door di Sussebeek pa Sevinger. Sevinger ta insisti sinembargo cu 3 luna despues, e la paga esaki bek na Sussebeek, pues no por papia di soborna e minister. A cuestiona e hecho cu Sevinger a bisa cu e ekiponan ta di Sussebeek y cu e mester tabata na cas di Sussebeek pero cu ‘ no tabatin lugar’ na cas di Sussebeek. Huez a cuestiona esaki, confrontando Sussebeek cu e pensando cu si ora cu e la order e ekipo, si ta pe anto, e no por a midi e espacio y sa delanta cu e ekipo lo no a ‘fit’ den su cas. Sussebeek a conta su version e ora pakico no tabatin lugar na su cas pa e ekiponan. Asina mes Sevinger tambe a añadi cu mientras cu e intencion tabata pa hiba e ekiponan na cas di Sussebeek, a ‘dicidi’ pa tene nan na su cas mes, despues di e entrada hudicial, pasobra lo a mustra ‘straño’, cu diripiente ta saca e ekiponan for di su cas y e ora lo a bin otro acusacion contra dje di e desaparicion di e ekiponan. Aki ta unda un biaha mas huez a cuestiona Sussebeek pakico e no a regla cu e machine por a pasa den su espacio na cas. 

FABORNAN

Despues di trata e parti di e regalonan, a bay riba e fabornan bek duna, a cambio di e regalonan. “Pasobra pa e regalonan, mester a haci fabor (bek)” e huez a bisa. Huez a cuminsa repasa e cantidad di traspaso di opcion di tereno erfpacht cu Sussebeek a haya via varios di su companianan. Tur a sosode tempo cu Sevinger tabata minister di infrastructura den e periodo 2009 pa 2017. A repasa cu Sussebeek a haya por lo menos opcion pa 7 tereno, entre nan uno cu un ruman di dje lo a haya opcion, pero no a haya e tereno finalmente. Ademas segun por a compronde e la haya 3 opcion mas di tereno via su mama. Pues na tur, un solo persona a haya 11 tereno, via varios di su companianan. Huez a repasa testimonio di un ex persona di DIP e tempo ey , sr Tsu, cu a comenta durante su interogacion cu ‘Sussebeek tabata haya tur tereno, y cu Sevinger tabata duna esaki. “No ta normal cu esaki ta sosode. Hende ta bira hopi rico asina” huez a cita Tsu di su interogacion na landsrecherche y a confronta tanto Sevinger como Sussebeek cu e declaracion aki. Aki Sussebeek a sigura cu tur loke cu ta wordo considera como ‘regalo’ no ta ‘regalo’ pasobra Sevinger a paga tur cos bek. Ademas a sigura cu e gym no ta di Sevinger sino di Sussebeek. Ademas, segun Sussebeek, nan ta amigo. “  Nos ta amigo, nos no mester cumpra otro. No por papia di corupcion” Sussebeek a sigui bisa. Aki huez a puntra Sussebeek, kico e ta pensa cu mag y no mag entre amigo” Tur loke mi a haci como amigo, ma haci como amigo. Loke mi a haci como comerciante ta comerciante” Sussebeek a sigui bisa. Ademas, segun Sussebeek, semper e la haci peticion pa tereno. Y e la cuestiona e declaracion di Tsu, pasobra Tsu no a duna Sussebeek conseho negativo pa tereno. “Mi no ta compronde Tsu. E mes a recomenda pa e tereno”. Aki huez a puntra Sussebeek, cu e hecho cu a haya tur e terenonan, ta Tsu mes a aproba esaki. “Pues no ta necesariamente debi na e amistad entre boso dos?” huez puntra. “  Corecto” Sussebeek a contesta. Algo cu a hala atencion, tabata ora cu huez a confronta Sevinger, riba su relacion di amistad. “ Si bo ta un amigo di Sussebeek, bo no ta haya cu lo bo mester ta mas resistente pa yud’e?” e huez a puntra Sevinger, dunando un señal cu Sevinger mester tabata juist mas cauteloso ora ta trata di amigo. Aki Sevinger a contesta cu un contundente “No”, argumentando cu no ta pasobra e ta su amigo, e mester trata Sussebeek diferente. 

HOPI PLACA PA TERENO CHIKITO

Tabatin tambe e intercambio di informacion riba traspaso y otorgacion di algun tereno comercial, manera un tereno na Eagle Beach. Aki tabatin un caso unda cu lo Sussebeek a haya conseho negativo pasobra tabatin un sistema di riolering abou. Y si e tabata kier, lo mester a realoca e sistema pa cual Sussebeek mester a core pa e gastonan. Loke tabata interesante segun e huez, ta e hecho cu dos siman prome cu e peticion pa e tereno a drenta, tabatin un conseho caba y huez a cuestiona esaki y a pidi pa un splicacion. Segun splicacion di Sevinger, por bien ta cu e tabata trata di terenonan cu tabata verkavel pa cual ya caba tabatin consehonan cla delanta. A confronta Sussebeek cu un transaccion pa un tereno di Carlo Mansur Jr, otro sospechoso den e caso aki, pa cual Sussebeek a paga Mansur 35 mil florin den un termino di dos aña. “Bo ta haya esaki normal?” e huez a cuestiona Sussebeek. “Si”, e la bisa.”Si e kier e asina, ta ok” . Huez a cuestiona tambe e asunto cu mientras cu opcionan pa tereno ta pa un tempo di 6 luna, conforme un decreto ministerial, y cu no por surpasa esaki, pero den practica tabata prolonga esaki cada bes te na 1 aña y mei. Sevinger a bisa cu esey ta berdad pasobra den practica, casi nunca, un desaroyado ta keda cla cu tur cos dentro di 6 luna. Despues finalmente, a trata e benta di un tereno door di Sussebeek cu e la haya, pa e suma di 2.4 miyon florin. Un tereno cu ta hopi mas chikito cu esun pa cual e la paga 35 mil florin. Segun Sussebeek, mester pone den contexto unda cu e area di e tereno aki ta. Y como ehempel, e la bisa cu pa un tereno entre 50 y 100 meter mas leu, a paga 11 miyon pa e tereno ey. Pues, de facto, e 2.4 miyon aki ta hopi hopi mas abou. Ademas, segun Sussebeek, e suma tabata a base di calculacion di cuanto e proyecto cu e kier a desaroya, lo a genera. “Si mi no a bende e tereno pa e prijs ey, mi lo a gana e suma ey finalmente toch” Sussebeek a bisa, indicando cu si ta awor of despues, e lo a genera e suma ey toch. Y e la admiti, cu enberdad, e tabata un bon deal. Huez a cera e tratamento di e parti aki di e dossier. Diabierna mainta, ta trata e Fundacion Bon Curazon di Benny Sevinger y despues e circumstancianan personal di cada sospechoso, pa por tene cuenta cu ne durante e sentencia.