Problema cu Aruba Boothcamp Foundation ta continua

ORANJESTAD - Mas mayor y comunidad preocupa cu Aruba Bootcamp Foundation y ta cuestiona pakico ningun instancia a interveni den esaki ainda. Esaki e matutino partner di NoticiaCla.com, Bon Dia Aruba ta raporta awe. Segun e matutino a publica diabierna declaracion di ex fundado, mayor y dos ex participante, noticia a drenta diasabra mey anochi, e matutino a ricibi informacion cu 8 mucha a huy for di e Bootcamp. Ta trata di un mucha muhe y 7 mucha homber, cual te ultimo informacion ricibi, 6 tabata perdi ainda.

DISGUSTO

Un di e mayornan a expresa disgusto enorme den e forma cu ta anda cu su yiu y den contacto cu e director Gilbert Webb el a bisa su persona cu nan ta hopi iresponsabel. Sinembargo e director den un tono trankil a bisa e mayor cu nan ta buscando e muchanan y cu polis tambe ta buscando. E mayor a cuestiona esaki como cu e luga tabata cera y scur. Ora cu e mayor a presenta na e sitio a constata cu e hoben ta paden y tur otro hoben ta drumi y no ta buscando e muchanan cu a huy.

YUDANDO POLIS

Den tur esaki ex fundado sra. Astrid Vries tambe a yuda e mayor y polis den e situacion. Na momento cu polis a presenta na e sitio y a puntra pa informacion di esunnan cu a huy e director no por a ni menciona nomber y adres di e muchanan y cu nan meld na polis y a meld na e mayornan, sinembargo otro mayornan no tabata na e sitio. Sr. Webb na dado momento a bisa cu e no kier Sra. Vries riba e tereno pa motibo cu e lo ta geschors. Polis no a haci caso como cu Sra. Vries tabata na e sitio hunto cu un mayor y a mustra riba e hecho cu e no ta doño di e tereno. Polis a sigui na haci un inspeccion di e luga y a avisa e director pa e wak bon locual e ta haciendo pasobra cos no ta bayendo bon. “12or di marduga mi a wordo avisa cu mi yiu a huy for di 9or di anochi, e por a comunica cu mi mas trempan.”