Wever-Croes: Kier bin cu caretera dwars door di refineria pa conecta San Nicolas miho cu Secrets Hotel

ORANJESTAD – GObienro ta evaluando pa bin cu un caretera cu ta pasa dwars door di e (tereno di) refineria di Aruba y yega na e proyecto hotelero cu ta bira Secrets Hotel na Baby Beach y besindario. E intencion ta cu asina, e caminda ta bira mas cortico pa yega e hotel, enbez di pasa full rond den Colony. Diaranson mainta   Prome Minister Evelyn Wever-Croes a haci un recorido riba e tereno di RDA (Refineria di Aruba) pa mira asina diferente aspectonan di e refineria y e proyecto specifico aki  cu ta wordo planifica door di DOW. 

Manera indica caba, un di e proyectonan ta un caretera cu a wordo proyecta ya un par di aña pasa. E caretera lo pasa a traves di e tereno di e refineria y yega na e area di Colony, Baby Beach y Rodgers Beach y na Secrets Hotel mas lihe. Prome Minister diaranson mainta a haci un ‘site visit’ pa asina haya splicacion amplio di e proyecto aki.

E mandatario a remarca cu tawata un mainta cu hopi informacion interesante. Por a mira tur e posibilidadnan y lo sigui traha y studia e proyecto aki y mira si tin necesidad di un caretera asina pa conecta e centro di San Nicolas mas lihe y mas efectivamente cu e area turistico cu ta den desaroyo aworaki.