Wix: No a tende e ultimo palabra riba referendum pa RIU

ORANJESTAD – E hecho cu sindicato FTA a gana e referendum pa dos departamento na RIU hotel, no kier men cu a tende e ultimo di e caso aki. Abogado di RIU na Aruba, mr. Ronny Wix a splica NoticiaCla.com cu ainda tin cu bin e ‘bodemprocedure’, cu por determina cu tene un referendum pa e sindicato haya representacion, no tabata apropia y corecto. Esey ta pone e sindicato den un otro situacion segun Wix. “Esey ta un pregunta cu ainda ta un subject to discusion”.

PODER REVOCA

E abogado ta mustra cu esey ta nifica cu e base cu a duna e sindicato e poder pa representa e trahadonan na RIU, ta caduca. “E pregunta e ora ta si e acuerdo cu nan a sera (manera un contracto colectivo) , ta valido”. E discusion ey ta full un otro discusion, cu ainda mi no por contestabo. E risico pues tey, segun e abogado, cu tur loke yega na dje, despues cu e veredicto final cay, no tin validez. “E ta un posibilidad cu e base legal pa yega na un CAO, ta wordo anula. E pregunta ta bira e ora kico ta pasa cu e CAO” Wix a sigui bisa.

MAS PRACTICO

Mirando esaki, opinion personal di Wix, ta cu esey ta pone cu bou di e circumstancianan aki, lo tabata mucho mas practico, si a schors e referendum di tuma lugar. Esaki netamente pa evita e situacionnan ariba menciona. Esta un CAO cu despues ta resulta cu no tin un base legal. Mes momento Wix a clarifica cu nunca no tabatin pleito entre partidonan (durante e lunanan cu e discusion aki tabata andando). Semper tur partido tabata kier mas bien un clarificacion riba e asunto aki. E ultimo decision ta esun mas importante, y mester di claridad. “Mi ta kere cu e decision final mester ta loke e ta pero e mester bin. Pa otro biaha no tin otro caso mes” Wix a bisa finalmente. Pa aworaki, sindicato tin un base legal pa representa e trahadonan. Pa cuanto tempo, esey no ta conoci. Mientrastanto e sindicato por reuni pa tin un CAO. No ta obliga pa esaki tuma lugar. Pero e ta posibel.