Juan David Yrausquin su ultimo reunion parlamentario como minister

ORANJESTAD – “Nos no por permiti Hulanda habri e porta aki (refiriendo na e entrada den nos asuntonan autonomo) pasobra unabez e habri, e no ta sera nunca mas Parlamento mester para hunto contra actitudd di Hulanda. Esaki tabata su ultimo palabra como minister diaranson anochi den parlamento. Yrausquin a hiba su ultimo discurso den Parlamento como Minister di Finanza, unda el a splica henter e situacion cu a surgi entre Aruba y Hulanda, cual situacion el a cataloga como secuestro di e presupuesto di pais Aruba. Na final, colega minister Mike de Meza a gradici su colega pa su labornan. Yrausquin su enfoke na inicio di su discurso ta cu Gobierno no por compronde cu Gobernador (lesa Gobierno di Hulanda) no ta firma e presupuesto di Aruba mientras cu di otro banda Gobernador ta bisa di lo firma un ley di apoderacion, aproba door di Parlamento, pa haci prestamo pa realisa pago di debe y interesnan. El a haci un apelacion fuerte na tur partido politico, pa pone pensamentonan politico contrario un banda, y uni pa como un Parlamento manda un solo mensahe pa Hulanda, cu no ta acepta pa Gobierno di Hulanda mete den Aruba su asuntonan, un derecho cu Aruba a logra despues di lucha di e.o. fundador y ex lider di e partido mas grandi di oposicion, esta MEP.