• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

Huez a cuestiona sospechosonan Sevinger y Arends pa maneho di tereno erfpacht

ORANJESTAD – Tratamento den Corte di Apelacion di e caso penal Avestruz a inicia formalmente diaranson mainta despues cu e dos dianan prome a scucha algun testigo. E biaha aki tres huez ta tratando e caso, unda cu 6 di e 7 sospechosonan tabata dilanti e hueznan un biaha mas. E sospechoso Kurt Harms no tabatey, y ta premira cu su parti lo keda trata diahuebs mainta of atardi. E huez principal a cuminsa cu su preguntanan pa e sospechoso principal Benny Sevinger y despues a sigui pa e di dos sospechoso Leoncita Arends. Ambos a haya un serie di pregunta, cu e huez mes a haci e sospechosonan directamente. 

OTORGA TERENO

Huez kier a tende di e sospechosonan nan mesun palabra, kico nan tabata pensa riba cierto puntonan relevante pa e caso. Entre nan, e proceso y reglanan pa por haya un tereno erfpacht otorga. Usando declaracion adkeri di interogacion di tanto otro sospechoso como testigo, a confronta Sevinger cu esaki. Aki a bin resulta cu no tabatin criteria specifico pa otorgamento di tereno y opcion pa tereno. Sevinger a sigura huez cu ora cu e la bira minister, e la informa su mes kico e proceso tabata y e la dicidi pa mantene esaki mescos. Pero a resulta tambe cu realmente no tabatin reglanan ‘por escrito’, fuera di un plan di 7 punto cu un persona mester a cumpli cu ne. 

TUR HENDE TA MESCOS

E pensamento di Sevinger ta cu tur hende ta mescos, y no por desvia di esaki. Huez a cuestiona e ‘gesto’ aki, confrontando Sevinger cu testimonio di algun persona cu a bisa lo contrario. Ora cu huez a confronta Sevinger cu cierto declaracionan contrario, Sevinger a contesta cu esey no tabata berdad. E la sigura cu ora di tereno, tabata riba e base di first come first serve. Huez sinembargo a confronta Sevinger cu esey no tabata e experiencia cu henden tabatin. A confirma cu ora cu a trata e peticion pa opcion pa tereno pa e sospechoso Leoncita Arends pa e proyectonan  Deshaun, Damira y Elenath , tabatin un maneho pero cu cos no tabata bay semper conforme maneho.

MANDA TUR COS PA OM

Dado momento Sevinger a haci un expression den forma di ‘chiste’ pero cu e mensahe tabata hopi cla. “ Si mi bira minister di infrastructura atrobe, mi lo manda tur peticion pa tereno, pa OM prome, y despues pa DIP.. pa evita problema” e la bisa, indicando cu e ta conciente awor cuanto problema e ta haya su mes aden pa via di maneho di tereno. 

PROBECHA DI E SITUACION

Huez a sigui cu e otro sospechoso, den e caso aki Leoncita Arends, unda cu e la mustra dado momento cu partidonan ‘tur a probecha di e situacion dunando un bista no corecto di e intencion pa desaroya (proyecto) siendo cununca tabatin intencion realmente pero a opta pa bende e tereno.  Huez a mustra ademas cu e no ta kere cu e sospechosonan tabatin intencion pa desaroya tereno, sino pa bende esaki. Di otro banda, specula pa bende tereno, no ta castigabel pa ley. 

PETICION PA TERENO DESCUBRI NA CAS DI ARENDS

Huez a puntra Arends, pakico un peticion di tereno a resulta na su cas,  cu ta algo cu no mester ta asina. Un peticion di tereno mester ta na DIP of na minister. Arends a bisa cu e no ta corda. Ta trata di un tereno banda di Sasakiweg. Mientras cu e la bisa di no ta corda tur cos, a pidi huez pa lesa un documento riba cual e ta purba pone e situacion den contexto. Arends a usa e momento pa detayadamente splica con cos a bay, pero huez a hala su atencion bisando cu Arends a ‘conta henter un storia largo djis pa contesrta un pregunta. “Y esaki no ta productive pa progreso di e carta. Como tal huez a bolbe puntra Arends riba esaki, y a bisa cu e biaha aki mester a keda corto. Arends a splica cu e storia tabata necesario pa establece e relacion e.o. cu un inversionista Hulandes di fam van Heusen. Pero na tur, Arends finalmente a bisa di no por corda pa kico e carta a termina na su cas. 

ROL DI YIU MUHER 

Huez a prosegui cuestionando e rol di e yiu muher di Arends, esta Richardson, cu tabata director di e compania Elanath. Segun Huez a puntra Arends si ta berdad cu e yiu a haya e funcion, pa evita cu Arends ta wordo tilda politicamente, riba cual Arends a confirma esaki tambe. 

KEHO PA MUCHO TERENO

Un di e kehonan supuestamente di un di e conseheronan y trahadonan di Sevinger, ex sospechoso Every, tabata cu e tabata keha cu Arends tabata haya mas tereno cu otro. “Esey no ta berdad”, Sevinger a sigura e huez. Ora cu e huez a confronta Sevinger cu e declaracionan contra dje di Every, Sevinger a desmenti tur esaki. Huez a cuestiona con Every tabata maneha e asunto di tereno, siendo un persona clave di e minister. 

RELACION CU ARENDS

Huez a cuestiona e relacion tambe cu Sevinger tabatin cu Arends, pa asina mira pakico tabatin tanto tereno y of faboritismo pa cu Arends. Sevinger a confirma cu e conoce Arends, pero no ta su amigo. Contrario na e caso di su ruman D. cu via su compania di imprenta, si tabata amigo y a haci trabou pa otro ora cu Sevinger tabatin su compania di architecto y diseño, prome cu e la drenta politica. 

ELANATH TA DEAL CU TERENO SIN TIN E OPCION 

Huez a cuestiona e forma di opera di Elanath, cu tabata deal cu companianan sin cu e la haya e opcion di e tereno ainda. Algo cu e la haya hopi cuestionabel. Tabata como si fuera Elanath tabata sa delanta kico e lo a haya y kico no. Aki tambe huez a cuestiona e intencion di Arends di nunca desaroya un tereno cu e haya, sino bende esaki foi cuminsamento. Huez a confronta Arends cu varios ehempel, pero Arends a desmenti esaki parcialmente. Segun Arends, inicialmente si, e intencion tabata pa busca tereno pa desaroya proyecto. Pero despues e tabata haya personanan cu tabata interesa pa cumpra e compania di dje cu tabatin opcion pa tereno.Un di e casonan aki ta di e comerciante ex banker A. Lin. Declaracionan di Lin contra Arends, a keda desbarata pa Arends, indicando cu Lin tabata gañado. 

GASTA 500 MIL DEN DOS LUNA

Un punto cu huez a cuestiona tambe, ta e forma con Arends tabata ricibi placa pa e dealnan. Y no solamente esey, sino cu tabata trata di sumanan grandi cu tabata den wega, di cual algun suma grandi a keda paga den forma cash. Ora cu huez a confronta Arends cu un caso particular unda cu a pidi e persona en cuestion, pa paga Arends 60 mil cash, tabata pasobra segun Arends, e tabatin mester di e placa pa por a cubri gastonan di remodelacion di su cas. E cuestionamento no a stop ey. Huez e ora a puntra con un di e sumanan di benta di e compania, riba 500 mil florin, dentro di dos luna di a keda transferi riba su cuenta di banco, ya a disparce despues di 2 luna. Aki despues basta interogatorio, Arends a laga los cu posiblemente esaki tabata pa pagonan cash di premionan di su negoshi di loteria cu e tabatin. Pa e convence huez y fiscal, mester a splica su operacion di loteria detayadamente, di con e ta funciona, di unda e ta haya e lottonan, y con e pago di esaki tabata bay. Huez a termina e mainta y despues e caso mester a sigui pa atardi. E proximo dianan Noticiacla lo ta cubriendo varios parti di e caso aki.