Awe Hulanda ta tende si a logra forma gobierno nobo of no

DEN HAAG – Partidonan PVV, VVD, NSC y BBB awe mainta tempran ainda tabata na mesa pa loke tin cu bira e ultimo dia di negosacion pa loke ta formacion di un gobierno nobo. Awe e informadornan van Zwol y Dijkgraaf mester entrega nan relato final di e proceso pa bisa si tin un acuerdo pa forma e gobierno. Si esaki logra, ta nombra un formador cu tin cu busca candidatonan pa minister pa e proximo gabinete. Partidonan tur ta hopi optimista, incluyendo esun mas skeptico, Pieter Omtzigt. Promer cu yega asina leu, mester tin un acuerdo di gobernacion riba liñanan grandi, y tambe un acuerdo riba ken ta bira e formador y e candidato pa prome minister. 

SIGUIENTE PASO

Manera cu Noticiacla a raporta diamars, e nomber di ex informador y ex minister Ronald Plasterk ta zona como e candidato pa bira e formador y tambe proximo minister. E ta e persona cu Geert Wilders a postula pa bira e informador na inicio di e formacion. Plasterk ta bon conoci pa nos islanan ya cu e tabata minister cu cartera di Asuntonan di Reino. E tabatin un ‘beef’ tambe cu e partido actual den oposicion AVP, tempo cu Mike Eman tabata na mando ya cu e ta esun cu, contra deseo di AVP, a postula Alfonso Boekhoudt como gobernador na 2016. NOTA; E potret ta di archivo di ora cu Plasterk a inicia e proceso di informador na december ultimo.