FTA: RIU ta pone su nomber riba edificio di Radisson fin di luna

ORANJESTAD – Si Carlson Group gana e caso contra Aruba Growth Fund, dia 1 di juli e nomber di RIU lo ta riba e edificio di Radisson Hotel. Esaki a keda confirma pa presidente di sindicato FTA, Hubert Dirksz. Segun Dirksz, e abogado di RIU a bise esey. “Nos sa cu tin un caso den corte caminda AGF a lanta pa para e transaccion” Dirksz a bisa. Pero riba e pregunta cu si esey bay bon (cu Carlson gana e caso), e nomber di RIU ta riba e edificio, Dirksz a bisa, ‘Si, corecto”, citando abogado(nan) di RIU. For di e campo di AGF, NoticiaCla.com a compronde cu e informacion ey ta simplemente ‘papia’. “Hues ta dicidi”, tabata e comentario.

PLACA RIBA LEY

Mientras cu tin un ley cu ta stroba hotelnan pa ‘retira’ hende sin mas ora cu un hotel wordo bendi, toch esaki no ta sosode. Segun Dirksz, e problema ta cu e trahadonan tin presion, y mas ainda e necesidad di placa. Como tal ora cu nan wordo confronta cu sumanan grandi di placa (entre 70 pa 100 mil florin) pa termina nan relacion di trabou, nan ta tuma esaki. “Bou di e presion cu nan ta, e trahadonan ta prefera di tuma e placa y move” Dirksz a bisa. E problema ta cu maske cu e trahadonan tin derecho legal y ta proteha pa ley, tin e duda si RIU ta keda cu e trahadonan. “E trahado tin un necesidad di placa. E ta mira e placa. E ta tuma e placa, pero na final e lo lamenta” e lider sindical a bisa. E placa cu e trahado tuma, ta caba hopi lihe. “Si e no control’e (e placa), e placa ta caba hopi lihe. Sigur si e tin edad halto, e no ta bay haya otro trabou, cu ta pone den un situacion hopi dificil”. Dia 17 di juni proximo, huez ta dicta sentencia den e caso aki. NOTA: e foto ta uno di archivo di e nomber di e hotel riba e edifico di Riu Palace riba Palm Beach.