Cinco luna despues cu a haya curpa na costa na Vader Piet, polis a detene homber relaciona cu e caso

ORANJESTAD - Unit mensenhandel en mensensmokkel (UMM) di Cuerpo Policial di Aruba a detene un homber dialuna  relaciona cu e investigacion penal di un sucedido cu a tuma lugar na december ultimo caminda mas cu un persona a perde nan bida. 

Riba 11 di december 2023 mainta tempran Kustsurveillance a topa dos curpa sin bida na costa den cercania di Vader Piet. Den e siguiente dianan Kustwacht a haya dos curpa mas den awa. E sospecho ta cu e personanan aki a purba drenta Aruba ilegalmente via boto. Relaciona cu esaki UMM a cuminza un investigacion penal di e hendenan posiblemente envolvi den e caso di mensensmokkel aki.

E persona deteni awemainta ta wordo sospecha di a yuda den e viahe di contrabando den anochi di 10 pa 11 di december 2023. E investigacion ta sigui y mas detencion no ta wordo exclui.