Trahadonan di APA a drenta den accion awe mainta

ORANJESTAD – Trahadonan di Aruba Ports Authority cu ta cay bou di sindicato FTA, a bay den accion awe mainta. Esaki pa protesta cierto decision cu gerencia ta tumando. Segun e shopsteward Ryan Giel, Tin palabracionan haci durante negosacion cu e gerencia, pero cu awor ta wordo bira bek, creando desconfiansa entre sindicato y trahadonan. Tin varios problema segun e sindicato. Ademas e gerencia no tin un ‘open door policy’ y lo ta tarda pa reacciona riba cartanan di e sindicato.

PROBLEMA RIBA LAMAN

Ademas ta mustra cu gerencia lo kier scapa placa door di spaar hende ora di subi laman. A compronde cu pa ley maritimo, mester manda un cierto cantidad di tripulante a bordo, pa seguridad. Pero cu gerencia kier haci esaki cu menos persona, den plan pa ‘spaar placa’. Algo cu sindicato no ta di acuerdo cune. Esaki y algun asunto mas tabata suficiente pa e grupo di trahado pone trabou abou, pa asina haya atencion di e gerencia.