Problema di interupcion di coriente constante tin hendenan hopi fada na Aruba

ORANJESTAD – Tin hopi rabia den comunidad pa e situacion precario di coriente actualmente na Aruba. Rednan social ta yen di critica di ciudadanonan cu ta demonstra nan malcontento pa e interupcionan constante awor di coriente. Sea cual sea e motibo. Diahuebs cu tabata un dia liber pa hopi hende (Ascencion), atrobe tabatin ‘;interupcion atrobe’den algun bario cu a pone hende nan ‘fuse’ bula. Pa algun, e molester ta doble pasobra ta dos dia tras di otro cu nan ta haya nan mes confronta cu e problema aki. Si analisa e mensahenan di Elmar mes, ta 'practicamente' tur dia tin un of otro interupcion, y e motibo tambe ta varia. Esey no ta kita afo cu hende ta cansa di e problema y mas, e inseguridad cu coriente por bay cualkier rato, causando e inconveniencia y of problema comercial y residencial. 

BLAAS DI HELIUM

Loke hopi no ta compronde, ta cu diripiente, e causa mas hopi ta e asina yama ‘blaas di helium’, siendo cu pa aña e blaas aki ta existi y nunca antes tabatin problema cu esaki. Diripiente, un pa dos tin interupcion di coriente debi na entre otro e blaasnan cu ta drenta den contacto cu liñanan di coriente. Ta manera cu e ta un plaga unda cu hendenan ‘deliberadamente’ a bin discubri e ‘trend aki’ y ta haci esaki ‘pa malo’. Algo cu no ta asina, pero sigur ta parce asina si pa hopi. ELMAR e siman aki a te hasta manda un comunicado pa mustra cu esaki no ta inusual y cu na Merca e practica aki ta hopi conoci. A bay analisa e articulo cu ta data di 2020, esta 4 aña pasa. Pero na Aruba ta e aña aki, diripiente a cuminsa relata esaki como un di e motibonan pa interupcion di coriente. Hasta comentarionan riba rednan social ta cuestiona e motibo aki, y ta sinti cu esaki ta un ‘excusa barata’ di Elmar. 

ACCIDENTE 

Si no ta esey, ta accidente di auto cu ta causa e interupcion ora cu e un chauffeur accidenta cu su auto den un palo di luz, lagando henter e bario(nan) of te hasta districto(nan) completo ta bay ‘plat’. Tambe tin e problema di ‘fayo subteraneo cu kabel’. E hecho ta cu kico cu por ta e motibo, tin interupcion di coriente cu ta afecta miles di persona. 

NO TIN CORIENTE

E realidad ta cu e problema di coriente, ta birando un fenomeno diario, cu ta haci nos compara nos mes cu paisnan bisiña unda cu ta custumber cu tur dia un of otro barrio of districto tin problema di coriente. Loke ta mas remarkable ta cu mientras cu tin interupcion di coriente cada bez, e compania si ta exigi pa e pago di recibi tuma lugar na tempo, sino ta corta coriente. E siman aki loke no a yuda, ta e mensahe riba red social, di Elmar, pidiendo pa corda paga coriente prome cu weekend largo, pa net e dos dianan sigui, surgi interupcion di coriente. 

DIRECTOR RESPONSABEL

Hopi a cuminsa cuestiona e capacidad di e director actual, aunke por compronde cu no por culpa e director di tur e problemanan di coriente ya cu e no a causa nan. Y segun Elmar, tur e problemanan no ta culpa di Elmar sino esnan cu ta causa esaki, manera e chaufeurnan cu accidenta nan auto den palo di luz, hende cu ta laga e blaasnan di helium los. Riba nan mes, eseynan lo no sosode, sin envolvimento di hende. Asina mes, e pregunta ta surgi, kico mas Elmar por haci pa evita cu e tipo di problemanan aki ta sigui. 

PALO BOU DI TERA

A sugeri un biaha pa pone palo di luz bou di tera, pero a haya splicacion e tempo ey, cu fuera di ta mas caro, e tera hopi biaha no ta duna pa coba, ya cu tin calichi, y ta dificil pa coba pa pone e cabelnan bou di tera. Algo cu si ta sosodiendo cu e kabelnan di fibre optica di Setar. Pues ta surgi e pregunta, si no por usa e mesun infrastructura di Setar, pa pasa e kabelnan di coriente. Hecho ta cu comunidad ta cansa cu e situacion y kier un solucion. Sea ta baha e prijs di coriente, ta adapta e recibo ora di e problema of ta resolve e problema. Algo cu no ta facil, a lo menos cu cuminsa prohibi blas di helium, y pone proteccion rond di palonan di luz, pa evita cu autonan por causa e daña cu e ta causando actual.  Pero tambe tin e condicion di e palonan, unda cu recientemente uno a djis pega candela, y collapse, sin cu un alma a dal den dje of pega blas di helium den e waya.