Ta mustra cu tin un crisis constitucional actual na St Maarten

W’STAD/PHILIPSBURG - Despues ku presidente di parlamento di St. Maarten, Sarah Wescot-Williams regresá for di reunion di asamblea general di ParlAmericas ku ta tuma lugá na Paraguay e lo yama un di 3 reunion di parlamento pa trata kredensial di kandidatonan Richinel Brug (URSM) i Viren Vinod Kotai (DP). Brug i Kotai mester remplasá Luc Mercelina i Grysha Heyliger-Marten ku a hura siman pasá komo minister di gabinete Mercelina I.

Wescot-William a indiká kaba ku si parlamento keda den un impase asin’aki riba aseptashon di representantenan di pueblo tin e opshon pa e kandidatonan bai korte pa asina yega na un solushon. E kaminda di korte no ta esun ku Wescot-William ta preferá, pero e promé 2 reunionnan pa trata e kredensialnan di Brug i Kotai no a sigui debí ku no tabatin quorum i miembronan di oposishon ta nenga di koperá pa forma quorum.

Wescot-Williams ta bisa ku su promé intenshon ta pa yama un di 3 reunion, pero na mes momento e ta pensa ku kisas e mesun situashon lo bolbe presentá. E ta spera opinion públiko ta logra konvensé esnan ku a disidí pa no yuda pa sera quorum i hasi lokual ta spera di tur parlamentario, esta presentá pa reunion i pasa den e proseso di eksaminá kredensialnan di miembronan ku mester drenta parlamento.

Den kaso ku e parlamentarionan di oposishon no koperá  Wescot-William ta bisa ku mester wak ki otro solushon tin. Segun Wescot-William si a yama e mesun reunion 3 biaha i no tin quorum, no por bolbe yama esaki un di kuater biaha.

E reglamento di órden di parlamento di St. Maarten tabata stipulá ku si yama un reunion 3 biaha i tur tres biaha no tin quorum e reunion ta sigui e di 4 biaha ku pone esaki riba agènda irespekto kuantu miembro tin presente. Pero tabata Wescot-William mes ku a proponé pa saka e artíkulo aki pasobra e ta kontra di areglo di estado di St. Maarten ku ta stipulá ku tur desishon i deliberashon den parlamento mester tuma lugá a base ku ta kumpli ku quorum.

Eks minister di Antianan Hulandes, Roland Duncan a bisa ku el a tuma nota di e reunion di parlamento di 6 mei último kaminda miembronan di parlamento a abusá di nan poder. Nan a sali for di reunion despues di a pidi pa vota riba miembronan nobo di e “presidium” di parlamento, pero presidente di parlamento a nenga di hasi esaki.

Duncan ta bisa ku esaki no ta e manera kon demokrasia ta funshoná. Na su opinion tin tur indikashon ku partidonan di oposishon lo sigui ku e práktika aki ku e meta pa stroba funshonamentu di parlamento i gobernashon di St. Maarten.

Na su opinion e motibu pa hasi esaki ta infantil i ta sintá den e malkontentu ku despues di elekshon e partidonan aki a keda for di gobernashon. Duncan ta atvertí sinembargo ku ta trata di un proseder peligroso di parti di e partidonan aki pasobra e ta okashoná ku e sistema gubernamental frágil di St. Maarten por paralisá òf kolèps. NOTA: Texto ta scirbi den Papiamento fonetico di Corsou.