Delegacion comercial y diplomatico a sali pa Cuba

ORANJESTAD – Awe mainta un delegacion comercial y uno diplomatico a sali pa Cuba. E ta e prome biaha cu un delegacion diplomatico di Aruba ta sali pa e isla caribense aki. E parti diplomatico ta consisti di e.o. director di departamento di relacionan exterior, Sr. Edwin Abath, directora di Aruba Tourism Authority, Sra Ronella Tjin Asjoe –Croes y Minister di turismo Otmar Oduber. E delegacion di Camara di Comercio ta wordo presidi pa su presidente Daphne Lejuez y su director Leo Maduro. Hunto cu nan, lo tin varios comerciante cu tambe ta forma parti di e delegacion comercial. 

PROGRAMA

Entre e bishitanan programa, tin un encuentro na Embahada Hulandes estableci na Cuba, y un encuentro cu 4 minister di e gobierno di Cuba. Aki lo delibera riba e aspectonan cu ta pertenece na cada un di e ministerionan y e portanan cu ta habri na nivel mundial. “ Ta hopi ta esnan cu tin interes pa e apertura di Cuba. Hopi biaha ora nos menciona Cuba, ta pensa riba Cuba como e competencia pa Aruba pa lo cual ta trata turismo, pero di otro banda ta ofrece hopi posibilidadnan economico pa nos isla.” Oduber a reitera. Den e cuadro di e pensamento aki tambe tin un delegacion di Camara di Comercio cu a sali pa Cuba cu un mision economico.

COMPETENCIA

Riba e aspecto di mira Cuba como un competencia turistico e mandatario ta bisa cu lo ta bay tin diferente encuentro riba nivel economico pa haya un miho bista di e plannan pa Cuba pa e proximo añanan. Lo haya un mihor bista riba construccionnan di hotel, tipo di hotel, kico ta e acomodacionnan, kico ta e producto, e calidad di producto, mira si esaki lo por of si en caso e ta afecta Aruba y mira na ki termino e lo por tin su efecto pa nos pais.

OPORTUNIDAD

“Mi ta kere cu e diferente encuentronan cu ta bay tin, lo brinda e oportunidad pa Aruba por haci un mihor evaluacion pa e consecuencianan di e apertura aki di Cuba pero tambe ta habri oportunidadnan nobo comercial cu nos ta spera di desaroya den e siman nos dilanti” Oduber a sigui bisa. E delegacion ta keda pa 4 dia y lo bolbe diabierna proximo.