Croes: Windsurfernan Boneriano pa Highwinds mes a opta pa paga impuesto pa nan material

ORANJESTAD – Un grupo di windsurfers di Bonaire a haya, loke nan ta yama, un mal experiencia ora cu a yega Aruba pa participa den e competencia di windsurf internacional, conoci como Aruba Highwinds. Esaki pasobra nan a haya nan mes ta paga impuesto pa nan ekiponan di windsurf, siendo cu e material ta di nan y usa. Den un reaccion di e director di Douane na Aruba Ricky Croes pa noticiacla, tin un proceso pa cana, y e surfernan a opta pa haci algo diferente pues  cu no ta falta di douane sino algo cu ta consecuencia di e surfernan mes. 

E SITUACION

E caso a haya atencion di prensa di Bonaire cu a raporta e incidente aki durante e siman aki. Un surfer specifico a wordo menciona, Pieter Zweers, cu a pasa den e situacion aki. Tabata ora cu e la yega Aruba dia 7 di mei, e la bisa cu e mester a paga un suma di 437 dollar pa tres persona. Despues cu e la paga e suma, e mester a bay cu e douanero pa un sitio pa reclama su material. Pero e material no tabatey. A resulta cu accidentalmente e material a bay Corsou. Segun Zweers, e problema aki a pone cu nan a bisa cu si otro biaha esaki sosode, nan no ta bin Aruba mas. Segun e relato di Bonaire.nu, e organisacion di Aruba Highwinds ta investigando e caso. 

REACCION DOUANE

Noticiacla a tuma contacto cu director di douane na Aruba, Ricky Croes, cu a reacciona mesora riba e tema. Den e caso aki, segun Croes ta trata di un ‘tijdelijk invoer regeling’. Nan (e grupo di surfer:red) mester a busca (un) broker pa haci e procedura pa ora nan yega, nan por pasa sin paga invoerrechten. Ora di bai bek mester zuiver aan e tijdelijk invoer.” Algo cu e windsurfernan no a haci. Segun Croes, tin un douane-agent ta bezig ta regel e tijdelijk invoer pa e torneo local di wind surf, pero esnan cu a yega lo a opta pa paga invoerrechten enbes di warda e tijdelijk invoer aangifte keda cla” Croes a sigui splica. Ademas, Croes a bisa cu for di Bonaire un persona cu a yega airport diahuebs mainta a ser splica over di e posibilidadnan di : vertreknota/tijdelijk invoer of paga invoerrechten. “E la duna di conoce cu e la compronde e procedura y a opta pa paga invoerrechten” Croes a bisa. Pues ta un malcomprondemento cu tabatin entre e surfer y e douaneronan unda cu uno no a compronde otro, pero cu ta procedura cu mester sigui.