Corte: Gobierno mester cumpli cu sentencia pa drecha problema di RWZI

ORANJESTAD – Gobierno un biaha mas a haya orden di Corte pa cumpli cu sentencia anterior cu medidanan pa drecha e situacion na e planta di purificacion di awa, esta e RWZI na Bubali, sino mester paga otro multa (a paga uno caba di 710 mil florin) halto total di mas di 3 miyon florin si no cumpli. E ta un sentencia largo y complica, unda cu Corte a tene cuenta cu e situacion di e planta, e capacidad real di Gobierno pa resolve e problema y e situacion legal pa cu e proceso di privatisacion di e planta proximamente. 

PASADO

Den e sentencia, e.o. (e sentencia ta 17 pagina largo:red) Corte ta mustra cu mientras cu e ta ordena gobierno (atrobe) pa tin varios tipo di machine funcionando, e no ta bay sentencia pa pone machine nobo, sino pa tin esnan poni caba, operacional semper, y solamente pa pone esnan cu falta, acerca. Ta trata di varios tipo di machine cu tin cu mengua e situacion di purificacion y tratamento di e awa. A sali na cla tambe cu no ta kier gobierno no kier coopera, sino cu ta por e no por, sea pa placa of tambe cu e proceso ta asina anticua y cu ta bay tuma hopi pa por logra resolve e problema. 

COMPANIA NOBO NO TIN PLACA

Loke a hala atencion den corte, ta cu conforme e sentencia, e compania cu tin cu bay maneha e planta y renoba esaki, a laga sa cu e no tin e placa aworaki pa haci esaki y lo dura poco prome cu esey por tuma lugar. Como tal, mester sali di e punto di bista, cu e tin cu opera cu e planta den e estado actual por lo pronto, y como tal tin cu aplica e ahustenan conforme e sentencia actual. Asina mes, ainda no ta bay pone e sentencia riba e compania, sino riba gobierno. Por lesa e sentencia completo AKI.