Sambil a bira e ‘Aventura Mall’ di Corsou

WILLEMSTAD – Corsou desde dos siman pasa tin un centro comercial (shopping mall) estilo manera un ‘Aventura Mall’, cu facilmente por wordo considera esun mas grandi e isla y tambe di e islanan ABC. E prome impresion for di ora cu un persona yega, ta cu e la yega un shopping mall ‘internacional’, ekivalente na uno manera na p.e Merca. Y ora cu e caba drenta e ‘mall’, e impresion ey ta keda confirma mesora. Despues di un retraso considerabel, (e mester a habri for di aña pasa), Sambil Curacao a habri su portanan dia 28 di mei ultimo, cu un ocupacion di 25% di e total di 160 tiendanan. E ta un proyecto cu ta data for di tempo di gabinete Schotte, cu a propaga e proyecto aki como e concepto cu 'lo crea 2000 cupo di trabou' pa e isla. Den comunidad ta discuti si esey en realidad por bira un hecho. Pero mientrastanto e 'mall' ta habri, y a laga un bon prome impresion atras. Si awor e ta 25% yen, ta premira cu pa aki dos pa tres luna e lo ta 50% yen, y dentro di 3 aña, e lo ta completo. Un concepto di Venezuela, Sambil International ta di famia Cohen, cu a tira bista riba Corsou algun tempo atras. Y 3 aña y mei despues, e proyecto a mira luz di dia.

DETAYES

E centro comercial ta espacioso (lugar pues pa 160 unidad) y ta traha y adapta na e grandura cu un isla manera Corsou por biba cune. Normalmente nan ta mas grandi (Venezuela, Sto Domingo y pronto Madrid), pero pa e tamaño di Corsou, e size ta uno apropia. Asina mes, e grandura ta impresiona cualkier persona cu bishita e facilidad pa prome biaha. For di lugar di parkeer, te na un di e 5 entradanan, (cada entrada tin nomber di un beach di Corsou), e centro ta gara bo atencion. Prepara pa pasa basta rato eyden, pasobra tin cos pa henter famia. Cohen a splica cu esey ta netamente e intencion. Mescos cu un mall na Merca, e ta ‘mas’ cu un mall. “E ta un centro comercial, un lugar di entretenimento, tin fashion, cuminda, e tin tur cos pa tur hende” Cohen a sigui bisa.

CONCEPTO

Mientras cu ta na 2015 e mall aki a habri na Corsou, e concepto venezolano mes ta existi for di 1958. E fundador di e concepto venezolano, Salomon Cohen (88), tin e cadena aki for di e tempo ey y a dicidi di sali pafo di Venezuela, prome biaha na 2012. Cu esun na Corsou habri, tin uno cla pa habri posiblemente e aña aki mes na Madrid.

APERTURA

Na su apertura, e gerente actual Jonathan Cohen, -nieto di e fundado Cohen-, a splica NoticiaCla.com cu tin 41 localidad sea habri, firma y of cla pa habri dentro di poco. Esunnan mas nobo pa habri, tabata e cinema (Cinemark), y e bowling ally (StrikeCone). Ademas tin un botica (CuraCare), pero cu lo tin dificultad pa habri mirando cu e minister actual di salud Ben Whiteman no kier a duna permiso pa e habri (ainda).