Homber solicita na Aruba pa droga, deteni na Venezuela

CARACAS – Autoridad venezolano a detene y aresta e fugitivo venezolano Wilfredo José Chirinos Cuicas, alias "El Will" na Valencia, y ta wardando peticion di extradicion pa Aruba. Chirinos ta un pensionado di e departamento antes conoci como DISIP, y awor a bira CICPC. Mientras cu interpol a confirma su detencion, e forma con e la wordo deteni ta varia. E fugitivo aki ta wordo busca pa autoridad di Aruba, riba cargonan di traficacion di 25 kilo di droga y ta trata di e caso Oslo. Ministerio Publico di Aruba a confirma e detencion y cu e proceso pa extradita 'El Will' a inicia. "Tur e otro sospechosonan ta enhuicia y ta sintando nan castigo", vocero di ministerio publico Ann Angela a confirma na NoticiaCla.com. 

DETENCION

Un version ta cu e la wordo deteni na Valencia den e avenida principal di e bario Paso Real de Flor, unda cu tabatin un confrontacion y unda cu Chirinos a resulta herida. Un otro version ta cu e la wordo deteni na aeropuerto di Valencia mes. Pero despues, NoticiaCla.com a pone man riba e documento oficial di detencion di Chirinos, cu ta confirma e detencion na aeropeurto di Valencia. Segun e informacion (lesa e informacion aki), Chirinos tabata riba un buelo di Aruba Airlines (AG111) for di Panama, y a wordo detecta na imigracion di Valencia, ora cu su orden di aresto via Interpol a aparece. Aki autoridadnan mesora a detene e persona aki pendiente su extradicion pa Aruba. 

CARGONAN

Documento di interpol ta mustra cu e ta responsabel pa un cargamento di 25 kilo di cocaina cu a wordo intercepta pa autoridadnan di Aruba. E proceso ta awor cu Aruba tin 60 dia pa presenta un solicitud ‘formal’ di extradicion. “Dado caso cu e documento aki no keda presenta na tempo, lo ordena e libertad di e detenido”, e corte di Venezuela a determina.