Relashona cu daño na Hofi Mango na Corsou, premier Pisas a reuni ku Jandino Asporaat

Posted on 05/7/2024 9:07 am AST | Updated on 05/7/2024 9:08 am AST

WILLEMSTAD  – Minister Pisas huntu ku Jandino Asporaat durante un reunion djaluna atardi a deliberá tokante e daño ku e proyekto Hòfi Mango a sufri durante e áwaseru eksesivo ku a kai djasabra último.

Por a mira riba medionan sosial e koriente fuerte di awa ku tabata pasa riba tereno di e proyekto okashonando daño konsiderabel na e restorant i otro instalashonnan riba e tereno. Asporaat a  presentá un plan pa trese posibel kambio na e aktual maneho di awa i Minister Pisas a duna un presentashon di resultadonan di inventarisashon ku Ministerio di GMN a hasi di lokual a sosodé.

A palabrá ku Ministerio di GMN i Ministerio di VVRP huntu ku ekspertonan di e organisashon di Jandino Asporaat lo evaluá e aktual maneho di awa na Kòrsou den su totalidat pa riba esaki bini ku un plan konkreto pa adaptá esaki den unu duradero na benefisio di Kòrsou.

Na mes momentu a traha un sita pa awe djamars 9 or di mainta na Hòfi Mango kaminda representantenan di e organisashonnan menshoná lo topa otro pa tuma nota di e daño na e hòfi i deliniá e siguiente pasonan.

Minister Pisas i Jandino Asporaat ámbos ta satisfecho ku resultado di e promé reunion aki. NOTA: Texto ta scirbi den Papiamento fonetico di Corsou. 

  • Powered by SETAR