Gobierno cu impuesto adicional pa hotelnan all-inclusive

ORANJESTAD – Gobierno lo introduci un impuesto adicional pa hotelnan All Inclusive, y esaki lo conta pa hotelnan all inclusive existente caba. E aumento exacto no ta conoci ainda pero lo negosha esaki proximamente cu instancianan manera AHATA. Prome cu su salida pa su biahe diplomatico pa Cuba awe mainta, minister di turismo Otmar Oduber a participa esaki na prensa. E intento asina, ta pa yuda frenta e fenomeno di all inclusive y no hacie atractivo pa hotelnan (sigur esnan existente), pensa pa cambia nan concepto di transient (hotel regular) pa uno all inclusive.

CAMBIA LEY

Ademas, Oduber a confirma cu e intencion ta pa prome ainda cu reces di parlamento, pasa un cambio/adaptacion di ley riba hotelnan all inclusive, ‘conforme e maneho anuncia di 2013’. Esaki e mandatario responsabel pa turismo, a participa tambe awe mainta. E tin cu conduci den un asina yama ‘vergunningstelsel pa esnan cu ta y kier tambe opera hotelnan all inclusive. E tin cu reglamenta tambe e fenomeno di tipo ‘add ons’ y ‘credit voucher’ tourism cu tambe ta afectando e mercado turistico di Aruba.

PROME NA MUNDO

E mandatario a sigura cu e la atende tur dos punto cu e asociacion di hotel, AHATA, pa informa nan di e decision y lo reuni cu nan dentro di poco pa atende e detayenan. Un di e motibonan pa e cambionan, ta e hecho cu recientemente a bira conoci cu Aruba a pasa di e di tres (3) pais na mundo cu ta depende totalmente di turismo, pa e di prome pais na mundo cu ta depende totalmente di turismo. Como tal mester ‘salvaguardia e bienestar di nos turismo’ y ta implementando e reglanan nobo aki.