Minister Thijsen a tene charla riba Boy Ecury na “Cena di Libertad” na Den Haag

DEN HAAG  – Na Biblioteca Central di Den Haag a tuma lugar un asina yama Cena di Libertad, osea e “Vrijheidsmaaltijd” organisa pa Dutch Caribbean Book Club y Biblioteca Central di Den Haag. E “vrijheidsmaaltijd” ta un iniciativa di e Comité 4 en 5 mei cu ta responsabel pa e organisacion di e Conmemoracion riba 4 di mei y e eventonan den cuadro di “Bevrijdingsdag” na Hulanda. E “vrijheidsmaaltijd” ta tuma lugar na diferente citionan den diferente ciudadnan na Hulanda.

E evenemento ta trece 70 persona hunto na mesa pa papia riba libertad y democracia y tin como tema central: ‘Boy Ecury, een Arubaanse jongen in het verzet’. E programa a cuminsa cu un discurso di Minister Plenipotenciario di Aruba mr. Ady Thijsen. Sr. Thijsen a cuminsa na bisa cu un dia prome su persona hunto cu Prome Minister di Hulanda, Minister di Defensa, Minister Plenipotenciario di Curaçao y Secretario di Estado di Bienestar General a pone un krans na e monumento riba e dam na Amsterdam pa recorda e victimanan di Segundo Guera Mundial. \

Despues di e discurso di Minister Thijsen e programa a sigi cu un charla di Nelson Lacroes, kende a conta mas riba e bida di Boy Ecury y tambe e otro heroe di resistencia manera George Maduro y Tirso Sprockel.

Prome Minister di Aruba mr. Evelyn Wever-Croes a duna un bunita discurso riba video den cual Premier Wever-Croes a acentua e rol heroico di Boy Ecury durante di Segundo Guera Mundial.

E programa a keda ilustra cu musica di e pianista Alexander Kraft van Ermel, nieto di e conocido pianista y compositor Curasoleño Wim Statius Muller.