My Guardian Group Walk & Run 2015 grandi un biaha mas

ORANJESTAD – Awe mainta tempran a tuma lugar un biaha mas e exitoso evento deportivo organisa door di Guardian Group Fatum, esta e “My Guardian Group Walk & Run 2015”. E cantidad di persona cu a inscribi y participa a surpasa tur e expectativanan di Guardian Group Fatum. Asina cu e evento a wordo anuncia den e medionan di comunicacion den un tempo record, Guardian Group Fatum por a anuncia cu nan ta sold out.

REGISTRACION

E participantenan a yega hopi trempan den oranan di mardruga caba pa percura cu nan ta sigur bon registra. Voluntarionan tambe tabata presente for di mardruga pa percura pa tur cos pa e participantenan. E careda a sali 6 or di mainta y e start shot a wordo duna door di Su Excelencia Prome Minister di Aruba mr. Mike Eman, cu tambe a participa den e disiplina di 6 km. Na e final e participantenan tabata wordo espera cu frutanan fresco pa come, awa, iced tea, Gatorade, awa di coco di Vita Coco y sopi cayente. Pa e participantenan cu gana y energia di move mas, a haya e oportunidad aki huntu cu Hit Fit di Cuts & Curves. Por ultimo si bo kier a tuma un ducha fresco, mayoria di e coredonan a haci uzo di esaki.

ARUBA LIMPI

E aña aki Guardian Group Fatum no solamente a pone enfasis riba e importancia di movecion y haci deporte, pero tambe riba tene nos Aruba limpi. A pidi e participantenan pa tene cuenta cu nos medio ambiente door di deposita e obhetonan uza pa hidrata nan mes den e areanan designa pa esaki. Grandi, chikito, coredo, canado, tur a comprende esaki bon.

GANADORNAN

My Guardian Group walk and run a conoce un cantidad grandi di ganador den diferente categoria. E ganador absoluto dama 6 km ta Julianne Dorothal y e ganador absoluto cabayero 6 km ta Charlon Sumter, cual tabata e ganador absoluto tambe na e My Guardian Group Walk & Run na Boneiru. Cada uno a gana un ticket pa bay Corsou, incluyendo e registracion pa e “My Guardian Group Walk & Run” riba diadomingo 25 di october 2015. Ganador absoluto dama 10 km ta Merriene Stamper y e ganador absoluto cabayero 10 km ta Ronald Starring. Nan a gana un ticket pa bay Corsou, incluyendo e estadia pa 2 anochi y registracion pa e “My Guardian Group Walk & Run” riba diadomingo 25 di october 2015.

GRADICIMENTO

Guardian Group Fatum, kier felicita tur persona cu a participa y engrandece e evento deportivo aki. Alabes Guardian Group Fatum kier gradici Aruba Triathlon Association, SIZZ (Mary Joan Foundation), IBISA, Rode Kruis Aruba, KPA, Cuts & Curves, Divi Resorts Aruba, Albo, Ling & Sons, Romar Trading, Total Services, Baseball team White Sharks, Smit & Dorlas, Animal Rights. Tambe e voluntarionan y tur persona cu di un of otro forma a yuda na e exitoso evento aki.