Corte: Ta trata apelacionan di caso Avestruz entrante 13 di mei di proximo

ORANJESTAD – Corte di apelacion a reserva dos siman di luna di mei 2024 pa trata e apelacionan di caso  Avestruz. Specificamente lo tin tres huez pa scucha y trata e  7 sospechosonan. Noticiacla a compronde cu e caso ta cuminsa pa 8:30am tur dia y caba 5’or di atardi.  Ta trata di e sospechosonan Benny Sevinger, Pieter Sussebeek, Carlo Mansur Jr, Maria Leoncita Arends, Ninuska Nuñez, Edgar (Gabby) Werleman y Curt Harms. Tur sea a apela parti di nan sentencia den e prome caso, of Ministerio Publico a apela nan sentencia. Specificamente, cuater sospechoso a apela parti di nan sentencia mientras cu Ministerio Publico a apela sentencia di tres sospechoso. E hecho cu tin dos siman reserva, no kier kier men cu tur dia lo tin caso, ya cu hueznan por programa algo durante e prome dianan y dicidi eynan, con ta usa e dos simanan mas optimalmente. 

SCUCHA TESTIGO

Ultimo biaha cu a trata e caso den regie aña pasa, abogadonan por a presenta nan deseo pa cu nan cliente, unda cu apenas 2 abogado a pidi pa scucha 2 testigo mas. Ta trata di L. Harms y A. Fowler.  . Fuera di esaki, tin 4 otro testigo cu ya caba a wordo solicita pa wordo scucha den e caso, pa e caso di sospechoso Benny Sevinger. Segun abogado Demis Illes, e dos testigonan nobo aki por a duna claridad riba e asunto di e gym na cas di Sussebeek, y tambe e bendemento di tereno na Sussebeek, pa cual e ta wordo acusa.  Ademas abogado pa sospechosonan Nuñez y Werleman, Rudy Oomen a pidi pa un testigo, den e caso aki un notario J, pa loke ta e proceso di traspaso di tereno erfpacht, unda cu kier demonstra cu ningun momento e clientenan no a malinforma gobierno di Aruba cu nan transaccionan. Tur e peticionan haci,   a wordo considera pa e tres huesnan cu ta trata e caso. A compronde cu e testigonan cu a wordo aproba pa wordo scucha, ta wordo scucha e prome siman di e caso. Esey ta e motibo cu e proceso e biaha aki ta bay tarda un poco mas.