Situacion laboral a afecta benta y imagen di Ling & Sons

ORANJESTAD – E situacion laboral cu e supermercado Ling & Sons a pasa aden recientemente, definitivamente a afecta e benta di e lugar. Esey e director di e supermercado, Richard Eman a confirma na NoticiaCla.com diabierna durante un conferencia di prensa. “E la afecta nos benta, y riba caya tin critica con nos ta trata nos hendenan” Eman a bisa. E ta lamenta esey pasobra nan no ta haci esaki. Eman ta sigura cu e supermercado ta trata su hendenan bon y como tal e acusacionnan ey no ta na lugar. Lo haci tur cos pa drecha tanto e imagen y e comunicacion.

COMUNICACION

E director (hunto cu sindicato FTA) a confronta prensa diabierna mainta pa duna un splicacion riba tur e desaroyonan cu a tuma lugar recientemente y cu a pone e supermercado den un luz negativo. A repasa e existencia di e supermercado, y su proceso di cambio di doño, te na e momento cu e problema laboral recientemente a tuma lugar. E director ta sigur cu sa unda e problema tabata. E problema cu a causa tur cos ta falta di comunicacion. Falta di comunicacion cu e trahadonan y cu e sindicato. “Si bo tin tanto bon contacto cu bo trahadonan, y nan ta cana bay pafo haci asina, e ta algo straño. E la sorprende nos hopi” Eman a sigui bisa.

JAN HUP

“E homber a perde cabez” ta e forma con e director di e supermercado Ling & Sons, Richard Eman, a describi actitud recien di e gerente Jan Hup, ora cu e ultimo aki a actua contra algun trahado. Segun Eman, Hup a bisa cosnan cu no mester a bisa. Hup, mientrastanto ta na Hulanda (e la bay for di momento di e incidente 15 di mei) y no ta trahando aworaki. “E ta gescheduled pa reuni cu e doñonan, y eynan nos lo tende kico ta bay ta su envolvemento cu nos ainda”. Eman no por a bisa si a suspende Hup, pero lo tende esaki despues.