Grupo di Betico ta lansa produccion internacional incluyendo e tema ‘Locura’

ORANJESTAD - Grupo di Betico a lansa produccion internacional ‘Locura’. “Amistad, Felicidad y Alegria t’e sinomino di Grupo di Betico pa 55 aña, esaki ta parti di e produccion cu peso pa exportacion” e grupo ta bisa riba rednan social. Segun e grupo, a yega e momento pa concretiza un soño y mas ainda honrando di e creador di e sonido cu nos conoce Grupo di Betico esta Hildward Croes [d.f.m.], e maestria di Gos Oduber, e vesatibilidad di Miguel Genser plus cada un integrante cu tey y tur esnan cu a bay ta admirando e obra di arte musical aki for di cielo.

HABRI HALA

Grupo di Betico ta habri su hala hancho pa bula surpasa nos frontera pa mustra mundo e alegria unico y sin igual di nos comunidad, e trankilidad den cada melodia y e paz di cada nota.

Grupo di Betico cu e produccion internacional aki ta un horcan di cos nan bon cu participacion di diferente  artista di renombre y ganador di premio nan importante manera Latin Grammy.

TEMA LOCURA

Den e tema’ki titula “Locura” tin aparicion special di e exponente Colombiano ‘Jerau’ cu ta invitado special cu a pone su extra sazon na su manera. Di parti di Grupo di Betico, Maikito Croes ta asumi e rol di cantente principal den e duetto contagioso aki. 

NUEBE TEMA

Locura ta un di 9 tema nan cu a wordo graba bao direccion di Raniero Palm, Miguel Genser, Maikol Lugo y Jonathan Vieira cu ta forma e album nobo titula Parranderos y lo sali mas despues den e luna di Mei 2024.

Sinti’bo orguyoso di ta un bon Arubiano…pasobra loke tin ta Grupo di Betico pa un bon rato, un locura cu dulsura. Click AKI pa wak e videoclip di Locura.