Parlamento a ‘schedule’ tratamento di ley matrimonio mesun sexo pa otro siman diaranson!

ORANJESTAD – Despues di hopi speculacion y comentario, Parlamento e siman aki a programa e tratamento di e ley riba matrimonio di mesun sexo, pa tuma lugar manera planea esta dia 8 di mei proximo. Tabatin speculacion di partidonan den Parlamento cu e ley lo no a wordo programa, debi na su embergadura y controversia di e tema. Tabatin te hasta gritonan cu ta bisa cu ‘si trata e ley aki, gobierno ta cay’, pasobra si e ley pasa esaki ta funesto pa e partido MEP. E siman aki e ‘oproeping oficial a sali, cu ta yama tur parlamentario pa trata e ley aki, cu ta cuminsa pa 9’or di mainta. E intencion ta pa na final di e tratamento, vota pa esaki y wak kico ta bira e resultado. 

CASACION

Manera cu prome minister Evelyn Wever-Croes a splica den e programa Noticiacla LIVE e siman aki na periodista Tito Laclé, tur cos ta posibel. Por bien ta cu Parlamento aproba e ley aki, mientras cu Corte di Casacion su sentencia ta contra, y visa versa. Y ta depende kico tur dos caso presenta, cu tin cu wak con tin cu bay atende cu e situacion e ora. Hecho ta cu Corte su decision ta final, y cu depende di e sentencia, Parlamento mester sea ahusta e ley pa cumpli cu e ley, of no.