Cu e ‘Via Legal Alternativa’, gobierno kier legalisa esnan bibando ilegal na Aruba

ORANJESTAD – Gobierno ta trahando riba un maneho temporal nobo pa yuda principalmente e mercado laboral di Aruba pa haya trahado. Den e programa Noticiacla LIVE e siman aki, prome minister Evelyn Wever a relata loke cu colega minister Glenbert Croes di labor ta trahando ariba aworaki. A puntra e prome mandatario kico su pensamento ta riba e pensamento pa legalisa stranheronan ilegal, cu ta na ARuba caba, y conberti nan den trahadonan legal. E prome mandatario a confirma cu su colega ta implementando e regla temporal, esta e ‘Alternative Legal Pathway’ osea e ‘Via Legal Alternativa’.

VIA LEGAL ALTERNATIVA

Segun e mandatario, e intencion ta pa ‘yuda’ e grupo di stranhero cu ta bibando ilegal riba nos isla drenta nos forsa laboral. Claro, cu tin reglanan specifico cu e stranhero aki tin cu cumpli cu ne. Entre nan, e mester a drenta Aruba di un forma legal, esta via p.e., avion. E grupo mas grandi di ilegal riba nos isla, a drenta Aruba di un forma legal, pero nunca a bay nan pais bek. Nan a basicamente ‘overstay’, nan tempo y asina bira ilegal. Mayoria di esaki ta sosode ora cu nan pasa 3 luna di e periodo cu nan por permanece riba nos isla como turista. E grupo aki, por bin na remarke pa e ayudo aki. Ademas, e persona mester por demonstra di no tin antecedente criminal, y un hende mester firma p’e. Si e stranhero ta cumpli cu e tres puntonan aki, e por bin na remarke pa e plan aki. E ora e ta haya un permiso di estadia y trabou, y por sigui biba riba nos isla. E problema cu tin ta cu tin basta peticion pega ainda na DIMAS, pues mester logra elimina e ‘tardansa’ aki pa por logra e plan aki. Cu e plan aki, e por yuda e mercado laboral grandemente. 

AMNESTIA Y ASILO POLITICO

Amnestia den e caso aki, segun prome minister Wever-Croes, no ta un opcion pasobra esaki lo crea un situacion di chaos, unda cu asina cu e opcion aki bira posibel, bo ta haya un avalanche di hende di Venezuela (y Colombia porta) ta cruza frontera, sea landa of den boto of con cu ta, basta nan yega Aruba pa pidi asilo politico pa cualkier motibo.  Click AKI pa wak minister presidente Evelyn Wever-Croes toca e tema aki.