Corte na Hulanda a rechasa peticion di dr Braam pa limpia su carchi di castigo

WILLEMSTAD\ – Korte di Den Haag di hurisdikshon Derecho Atministrativo siman pasá a rechasá petishon di dr. Braam pa limpia su karchi di kastigu. Braam ta di opinion ku inhustamente por sigui mantené su datonan di su kaso penal for di aña 2002 den e registro di kasonan penal pa un kaso ku no a imponé kastigu riba su persona. Braam ta sali for di e punto di bista ku despues di 20 aña, esaki konforme lei bieu, mester a kita su datonan for di e registro di kondenanan na Hulanda o sea, popularmente bisá, limpia su karchi di kastigu.

Ta konosí ku Braam tin algun tempu kaba ta bringa pa kita su datonan di kondena for di registro, tumando na konsiderashon ku ta trata di un kondena di mas di 20 aña pasá relashoná ku delito kontra di moral o sea delito seksual. Den HOF aki na Kòrsou a duna Braam rason ku e kondena di aña 2002 no por para den kaminda manera e lei di “screening” aki na Kòrsou ta bisa. Pero Abogado General di Korte di Kasashon, ta pensa otro i na e momentunan aki ta pendiente e veredikto di Kasashon riba e partikularidat aki.

Mientrastantu Braam a start un proseso hudisial na Hulanda, kaminda ku el a keda kondená, pa limpia su karchi di kastigu. Manera menshoná, e ta di opinion ku inhustamente ta sigui mantené su datonan di su kondena den e registro.

Korte di hurisdikshon derecho atministrativo a enfatisá ku e loke ku a persiguí Braam den 2002 esta inmoralidat kontra di un menor di edat, un mucha ku su mayornan a konfia e dòkter kuné e tempu ei. Korte a splika ku Braam a keda kondená, pero pa  motibunan personal i e daño ku el a sufri ku publisidat rondó di su persona, a pone ku Korte no a imponé un kastigu o un medida riba su persona.

E petishon di Braam ta pa kita su datonan for di e registro di kondena den kasonan penal, pero na aña 2004 e lei a kambia di 20 pa 80 aña lo keda mantené datonan den e registro,  spesífikamente pa kondenanan relashoná ku delitonan kontra moral o sea violashon  seksual. Esaki ta pa evitá residivismo, e lei a keda kambiá.

Pero Braam ta haña ku e kambio di lei no por tin influensia riba su kaso, tumando na konsiderashon ku su kondena ta registrá bou di e areglo bieu, esta esun di 20 aña.

Korte a splika den su veredikto ku e kambio aki no konosé un asina yamá transishon. Pues for di promé di apel 2004, e periodo di datonan registrá pa 20 aña no ta na vigor mas.

Algun otro punto ku korte a mustra ariba ta ku no tin  niun aspekto partikular o sea situashon ku ta pone ku por kita for di e lei aki. Braam den su apelashon a bisa ku mester konsiderá e periodo, e tempu i tambe su edat ku e tabatin ku ta hopi mas hóben, ku no por keda para riba e kondena mas. Korte a splika Braam, ku tempu ku el a kometé e inmoralidat, e no tabata dje hóben ei i e echo ku no  imponé un kastigu, no ta kita e seriedat di loke ku el a hasi. Tur otro aspekto, personal manera su karera, su bon nòmber, su trabou i su personalidat, no ta bai riba ku un bon ehekushon di lei hudisial penal o pa desviá for di e lei eksistente pa su persona.

Finalmente korte ta señalá ku e formashon di imágen aki na Kòrsou ta opvio i prinsipalmente e resultado di e kobertura di e medionan di komunikashon. E tribunal ta komprondé dikon Braam ke pa e registro ser eliminá, pero no ta sufisientemente kla ki impakto e eliminashon aki lo tin riba e atenshon ku ta keda konsiderá desafortuná di parti medionan. NOTA: Texto ta scirbi den Papiamento fonetico di Corsou.