FTA a gana derecho pa representa trahadonan di RIU

ORANJESTAD – Sindicato FTA a logra drenta RUI Palace hotel como sindicato awe, ganando dos di e 3 referendum teni.Den e departamentonan di bar y maintenance a logra haya suficiente voto pa sindicato representa e trahadonan di dicho departamento. Sinembargo den e departamento mas grandi cu a solicita e referendum, esta housekeeping, esey no a logra. Como tal e departamento ta keda sin representacion sindical. No obstante esey, sindicato ta contento cu nan a logra drenta, aunke no completo manera cu nan tabata kier.

RESULTADO

E resultado oficial tabata cu pa e bar, a logra 29 di e votonan necesario for di 46 cu por a vota (mester 24 minimo esta 50 +1 di e cantidad cu por vota). Den caso di maintenance, tur 14 trahado inscribi, a vota pro sindicato pues nan tambe a haya representacion. Pero den caso di housekeeping, inicialmente tabatin 63 persona cu por a vota, pero na final 15 a haya pakete di retiro y a bay, y a keda 50 persona. Di e grupo ey, 23 a vota pro, y 1 a vota contra sindicato. E cantidad necesario pa por a pasa tabata un minimo di 26. Pues pa 3 voto, e departamento no a logra haya e cantidad necesario pa haya representacion.

NEGOSHA CAO

Mirando e situacion, e sindicato a dicidi cu nan ta acerca gerencia di RIU Palace otro siman mes, pa sinta na mesa y wak ki ora por cuminsa negosha un CAO pa e trahadonan cu a haya representacion. Mes momento lo haci un intento pa toch laga e trahadonan di housekeeping (y resto di trahadonan di hotel) bira miembro, pa evita mas problema. A splica cu esey ta necesario, mirando cu tin division entre trahadonan pasobra no a logra e afiliacion. Esey ta trece cune cu entre e trahadonan tin un situacion laboral cu no ta sano.

MAL GERENTE

E presidente nobo di FTA, Hubert Dirksz a papia cu e trahadonan despues y splica nan e situacion y a pidi nan pa nan keda trankil. “Nos ta keda representa boso miho cu nos por. Boso tin nos sosten” Dirksz a bisa e trahadonan despues, pa purba motiva nan toch, despues cu no a logra afilia nan na e sindicato. Dirksz despues a splica NoticiaCla.com cu nan no ta nada contento cu e forma con RIU ta trata su hendenan, incluyendo e intimidacion pa cu e referendum di awe. “E ta tristo, amenaza. Explotadonan manera RIU no mester ta na Aruba. Sorry cu tin cu bisa esey, pasobra nos tin cu sinta na mesa pa traha” Dirksz a sigui bisa. “Tipo di gerentenan no mester ta na Aruba”.