ORANJESTAD – E fundacion Aruba Birdlife Conservation (ABC), conoci pa ta defende naturalesa, pahra y tur otro aspecto di medio ambiente di Aruba, kier claridad riba e tema di Isla di Oro. Pa medio di un rapport cu nan a publica recientemente, yen di informacion y documentario existente, e kier ‘claridad mei mei di misinformacion’. “Mei mei di debatenan recien y malinformacion riba e status di Isla di Oro, e rapport aki ta boga pa claridad” e conclusion di e documento ta bisa. “E ta enfoca e urgencia constante pa proteha Isla di Oro y ta confirma su tarea den mantencion di e salud di Aruba su estado ecologico”.
Segun e rapport, e mantencion di Aruba su naturalesa natural y e biodiversidad ta esencial pa nos bienester ecologico y economico. “Nos ta spera cu e rapport ta brinda su bista importante, den e pasonan tuma pa proteha Isla di Oro y mantene y proteha Aruba su patrimonio nacional cu mas forza” e fundacion ta sigiu bisa.
ISLA DI ORO
ABC ta corda cu Isla di Oro ta reconoci como un parti importante ecologico. E rapport presenta ta ofrece un bista historico di e esfuersonan di ABC y otro organisacionan pa proteha esaki. E rapport segun ABC, ta pinta varios logro grandi, cuminsando cu e peticion di ABC na 2012 na Parlamento pa proteha partinan importante di naturalesa, te na e asina yama Status Ramsar te cu 2023 cu ta un documento cu ta stipula cierto areanan di proteccion, conforme un protocol firma na e ciudad Iranes Ramsar , durante un convencion na 1971. Cu esaki, Isla di Oro ta wordo reconoci como un teritorio di proteccion di importancia internacional. E rapport ta inclui documentacion oficial, manera mocionan, ley y plannan di maneho cu ta enforsa e medidanan legal y administrativo cu a wordo tuma pa proteha Isla di Oro y e areanan den su cercania. Click AKI pa lesa e rapport completo.
ORANJESTAD – Despues di algun dia di ‘sosiego’, awe e fenomeno di perdida di coriente na Aruba a bin bek duro, unda cu no uno sino tres biaha caba, coriente a bay. Tur esaki mientras cu e team di MPR di Washington ta na Aruba pa investiga e problemanan cu tabatin ultimo tres siman. “MPR ta na Aruba continuando nan investigacion, y e problema di corriente y e molester y daño cu e ta haci nos comunidad lo haya: Conclusion, resolucion y acción y solucion” ta loke e minister encarga Glenbert Croes a bisa Noticiacla awe. E ta spera cu pa e fin di siman aki, e grupo aki tin un relato di e motibo y e solucion. Ta logico cu no ta culpa di MPR cu e coriente a bay, pero si ta bon cu nan mes por a experencia esaki pa porta agilisa nan investigacion riba e problemanan. Tambe, ningun di e biahanan aki, tabata trata di problema di blaas.
ORANJESTAD – Diabierna dia 17 di mei ultimo WEB Aruba y Wärtsilä Finland Oy a firma e ‘final take over’ di planta RECIP IV. Cu e firmamento aki, Wärtsilä formalmente a entrega e planta na WEB Aruba. Operacion di RECIP IV ta conduci na un reduccion drastico di combustibel, na menos emision di gas den medio ambiente y na tarifanan di coriente sostenibel. Ademas, na momento di interupcion di suministro di coriente, e tempo pa recupera ta hopi mas cortico cu den pasado. E ceremonia a tuma lugar den planta di WEB den compania di diferente mandatario, diferente partner di proyecto, empleadonan y contratistanan di e compania di awa y energia. Pa e ocasion aki a haci un donacion total di Awg. 27.500,- na diferente instancia educativo, social y deportivo.
ORANJESTAD – Den menos cu 12 ora, dos accidente separa a causa interupcion di coriente na Aruba. Si tabata blaas di helium, awor ta accidente tras di accidente ta sosode cu e mesun consecuencia. Mester bisa si cu e ultimo caso, ta mas bien un incidente cu un accidente. TA un truck cu a pasa ranca waya di coriente den area di Kudawecha cu a causa un interupcion grandi den area di Sabana Liber, Noord y vecindario. E interupcion awe mainta tabata algo despues di 9’or esta 9:08 di mainta. Esun prome, manera cu nos a raporta caba, a sosode algo despues di mei anochi, unda cu aki si un auto a accidenta mes, lagando suficiente destruccion atras di un palo di coriente completo.
ORANJESTAD – Diabierna marduga banda di 1:45 am, a sosode un accident na haltura di Franse Pas. Acausa di esaki un gran parti a perde coriente den area di Pos Chiquito,Sabana Basora, Burunbundo y Rooi taki. Tecniconan di Elmar a traha ariba esaki pa asina purba restablece coriente lo mas rapido posibel y pa 2:30am, barionan afecta a cuminsa haya coriente bek.