Prome Festival di Canto pa Scolnan Preparatorio

ORANJESTAD - En coneccion cu celebracion di e di 10 aña den aire di e programa radial di mucha Kids, nan ta organizando e prome Festival di Canto pa Scolnan Preparatorio.

META

E meta di e Festival ta pa no laga nos cancionnan di mucha na Papiamento bai perdi y tambe mirando cu pa e grupo di e edad aki no tin mucho actividad.

Entre nan por menciona cancionnan manera: Orjunchi, Ata ki mi boca, Chabelita, Rond di Aruba, Mi tata su truck y hopi mas.

E rekisito pa participa na Festival di Canto ta cu e cancion mester ta di mucha y na Papiamento.

Di e forma aki nos ta aporta, contribui y salvaguardia tambe na nos dushi Papiamento.

CATEGORIA

Tin 2 categoria:

Categoria di Jongste Kleuter

Categoria di Oudste Kleuter

ALL STAR BAND

Pa compaña nos muchanan tin e All Star Band bao direccion di Sr. Danny Koolman, un tremendo banda cu tin amor pa mucha y tin pasenshi pa guia cada un di e participantenan. Nos tin un total di 28 participante.

E Song Festival e aña aki ta tuma lugar Diadomingo 07 Juni 2015 cuminzando pa 4:00 PM den Aruba Entertainment Center na Dakota.

BAILE

Kids ta invita henter Aruba pa bin presencia un show cu no ta solamente canto di nos muchanan di scolnan preparatorio rond di Aruba, sino un expectaculo cu baile, talent, entretenimento y hopi sorpresa pa nos muchanan.

EVENTO SANO

Cu e evento aki Kids kier fomenta actividadnan sano pa nos muchanan den bario pa asina trece e famia bek hunto pa asina nan por disfruta y comparti momentonan dushi na un prijs accesibel pa tur famia.

Kids y Tante Juli kier gradici Unoca inmensamente como nos sponsor principal cu ta kere firmemente den apoya nos Cultura y den nos muchanan cu ta nos futuro.

INVITACION

Kids y Tante Juli y tur e 28 artistanan ta wardabo Diadomingo awor 07 di Juni pa 4:00 PM den Aruba Entertainment Center pa e prome Festival di Canto pa Scolnan Preparatorio.

Corda porta ta habri 3:00 PM. Carchi ta obtenibel na Sherry Berry na Tanki leendert, serca tur scol participante y serca tur e 28 artistanan.