Gobierno no ta coopera cu deal Raddison-RIU

ORANJESTAD – “Tin un daño hopi grandi riba e partnership entre gobierno di Aruba y RIU (hotel)”. Asina minister di turismo Otmar Oduber den forma di primicia for di New York, a describi e relacion actual entre gobierno di Aruba y e grupo RIU, na NoticiaCla.com. E mensahe na RIU tabata hopi cla e siman aki. Gobierno lo no coopera na nada pa loke ta e transaccion aki y cu definitivamente nos ta considera cu esaki ta un falta di respet pa gobierno di Aruba y pueblo di Aruba e mandatario a sigui bisa. Mas e mandatario no kier a bisa pasobra a keda cortico, debi cu ta papiando cu abogadonan ainda y buscando un forma cu Aruba por sali como un ‘no perdedor’ for di esaki.

REUNION CU EHECUTIVO RIU

NoticiaCla.com a compronde cu diaranson ultimo prome cu e sali pa New York (pa retreat di ATA), cu e mandatario a reuni cu e ehecutivonan halto di RIU, riba e topico aki. Na nomber di e doño mes, Luis Riu, a manda algun ehecutivo pa papia riba e tema aki. Y pues e mensahe tabata hopi cla. E mandatario a admiti cu e no a bisa nada hopi riba e tema ainda, pero lo papia riba e asunto aki otro siman. Pero e la confirma cu tabatin hopi combersacionnan tumando lugar e siman aki.

PALABRA FUERTE

A compronde cu palabranan tabata hopi fuerte y a mustra RIU cu nan no ta contento at all. Varios yamada a tuma lugar tambe cu e representantenan di Carlson Group, unda cu palabranan hopi fuerte a caya manera ‘business ethics’ cu no tin. A compronde tambe cu lo tin mas combersacionnan den e proximo dianan aki. NoticiaCla.com a compronde cu tin un sin fin di comunicacion tumando lugar ainda entre tur partidonan, anticipando loke cu huez ta bay dicta dia 17 di juni proximo. Tambe a compronde cu gobierno lo tabata hopi categorico den purba para e posibel acuerdo cu tin entre RIU y Carlson Group. Durante e discusionnan cu tabatin cu entre e mandatario y alto ehecutivonan di RIU, nan no por a confirma ni desmenti cu e hotel unabes cumpra, lo converti su mes den un all inclusive.

MISHI CU TRAHADO

A compronde cu no por mishi cu e trahadonan di Radisson, y cu manera cu a sosode tempo di Westin, a pidi trahadonan e tempo ey pa para duro y no tuma pakete. Esaki debi cu e cambio di ley ta duna tur trahado, ya cu e ta un ‘overname di un compania existente. Pues como tal, mester respeta tur derecho di e trahadonan. Sinembargo algun a bay, y otronan si cu a bay corte, a gana nan caso basa riba e ley cu gobierno a cambia na fabor di e trahadonan.