Presentadornan conoci Hulandes Sophie Hilbrand y Jeroen Pauw ta cuminsa talkshow riba NPO1

AMSTERDAM – E Hulandes cu mayornan di Aruba, Denzel Dumfries a keda seleciona den e seleccion inicial Hulandes cu ta participa otro luna den Copa Europa na Alemania. E entrenador Ronald Koeman a anuncia e lista di 30 hungadornan inicial cu lo forma e seleccion cu e ta hiba Alemania. Algun ausente notable ta e.o.  Mats Wieffer y Joshua Zirkzee cu recientemente a keda lesiona atrobe. Otro hungadornan manera ,Noa Lang. Marco Bizot, Thijs Dallinga, Jordan Teze, Calvin Stengs, Steven Berghuis, Jorrel Hato, Kenneth Taylor, Jurriën Timber, Jasper Cillessen, Guus Til y Justin Kluivert ta afo. Asina mes, tin hungadornan cu ta lesiona cu si ta riba e lista. Entre nan tin Frenkie de Jong, Memphis Depay, Justin Bijlow y Marten de Roon cu ayera e resulta herida. 

DEN HAAG - Segun un investigacion Hulandes (SEO) riba e maneho financiero di ministerio di relacionan di Reino, relaciona cu e presupuesto di e departamento en cuestion, e conclusion ta e.o. cu e esfuersonan pa mehora e situacion financiero pa Aruba no tabata efectivo. Esaki ta traduci den puctuacion di eficiencia. Di otro banda, e maneho politico manera e intento pa bin cu e RAFT, protocolnan entre Hulanda y Aruba, sanacion di debe y e prestamonan sinembargo a resulta den transparencia riba y cu bista riba e situacion financiero di e isla (nan), ayudo pa absorba e golpinan financiero y no financiero y e stabilidad financiero y confiansa di e mercado financiero. Pa mira e carta y e rapport referente esaki, por click AKI. 

DEN HAAG – Mientras cu e ambtenaar mas poderoso di gobierno Hulandes Richard van Zwol a keda apunta como formador di e proximo gabinete Hulandes, rumornan fuerte di fuentenan den e proceso, ta  menciona su nomber tambe pa bira e proximo secretario estado pa Relacionan di Reino (BZK), y cooperacion regional. Den pasado e tabata un funcionario halto den BZK caba, y conoce nos islanan hopi bon. Si esaki bira realidad, esey kier men cu Van Zwol ta bira e reemplasante di e actual secretario di estado Alexandra van Huffelen. Sinembargo, e lista tabata traha prome cu Van Zwol a haya e trabou di formador di e proximo gabinete, e chens cu e ta bira e reemplasante di van Huffelen, ta bira mas chikito. Fuera di van Zwol su nomber, e lista di nomber pa ministernan di e gabinete tambe ta circulando caba. 

DEN HAAG – E lidernan di partido PVV, VVD, NSC y BBB diahuebs mainta ora di Hulanda a presenta nan acuerdo di gobernacion den liña grandi. Segun e lider di e partido mas grandi PVV, Geert Wilders, solo ta bay briya atrobe na Hulanda, y hopi ta bay cambia. Entre nan, tambe e maneho di asilo ta bay ta hopi mas fuerte, incluyendo y ley di crisis di asilo, cu tin cu demotiva hendenan buscand asilo, pa bay Hulanda. E cunukeronan (boeren) di Hulanda tambe ta haya hopi cos bek cu a kita di nan algun tempo pasa, segun e lider di partido BBB Caroline van der Plas, y asina tin un cantidad di cos mas cu nan ta bay ‘drecha’. Lidernan di partido VVD y NSC tambe a menciona puntonan cu pa nan ta importante den e gabinete nobo aki. Entre nan, e reduccion di e prima di propio risico di seguro.

DEN HAAG - Richard van Zwol (CDA) a keda apunta pa e lidernan di partido PVV, NSC, VVD y BBB pidi pa bira e formador di e proximo gabinete Hulandes. Normalmente e formador ta bira e prome minister tambe, pero den e caso aki esey no ta e caso. Van Zwol mes a confirma cu e no ta bira e prome minister. E ta spera cu den 4 a 5 siman e mester ta cla cu su trabou. Su trabou ta pa busca candidatonan pa bira ministernan den e gabinete. E nomber di Ronald Plasterk ta sigui circula como e prome minister nobo, pero ningun hende no kier papia riba e tema aki ainda. Diaranson anochi ora di Hulanda, e cuater partidonan envolvi, a firma e acuerdo di gobernacion inicial, y a presenta esaki den liña grandi diahuebs mainta.   

DEN HAAG - Hulanda ta haya un gobierno derechista. Partidonan PVV, VVD, NSC y BBB a firma un acuerdo di gobernacion diaranson merdia, ora di Hulanda, 5 luna despues cu a cuminsa e negosacion. Loke falta aworaki ta pa discuti y yega na un acuerdo pa loke ta e candidato pa bira prome minister di Hulanda.