Roland Croes: Setar no ta bay cobra pa servicio di whatsapp

ORANJESTAD – Ningun momento Setar tin intencion di bay cobra pa uso di e servicio di whatsapp, -e plataforma gratis cu tin pa manda mensahe entre dos usuario di telefon-, manera cu rumornan pa basta tempo ta sugeriendo riba caya. Pero director di Setar Roland Croes ayera a sigura NoticiaCla.com cu esaki no ta e caso. Ni pa whatsapp ni otro plataformanan similar, Setar lo no cobra. Loke nan lo haci, ta busca alternativa pa genera entrada extra, ya cu enberdad plataformanan manera ‘whatsapp’ ta limita e entrada na manda mensahe via network di Setar.

DATA

Segun e director, Setar ‘lo no haci nada cu no ta comun den telecomunicacion’. Y esey ta inclui cu ‘no ta den nos planning (pa cobra pa uso di e servicio). Whatsapp ta simplemente un di e tanto aplicacion di data. Di otro banda, lo busca otro forma pa capitalisa riba uso di data, manera ora cu surpasa cierto cantidad, cu ta e forma con por genera extra entrada.