ORANJESTAD – Riba diahuebs, 2 di mei 2024, di 6.30 p.m. pa 8.30 p.m. lo tin un actividad na Biblioteca Nacional Aruba, George Madurostraat, Oranjestad organisa pa Biblioteca Nacional Aruba, Departamento di cultura Aruba y gestor cultural Mirto Laclé.
Publico en general ta keda invita pa presencia un charla y presentacion di un buki, cu tin como titulo ‘Bulletproof Sleep, make sleep count again’, skirbi pa dokter Joan Werleman, kende ta biba y traha na Merca como dentista.
Lo tin presentacion di documental cortico: di sra Graciela ‘Baby’ Werleman y tambe di Joan Werleman.
E buki di Joan Werleman ‘Bulletproof Sleep, make sleep count again’ ta trata e syndroom di Apneu. Esaki ta un disturbio durante soño cu ta afecta respiracion normal ora di drumi. Por describi e titulo di e buki como ‘Drumi Proteha, haci drumimento normal posibel atrobe’.
Cuanto persona lo no ta sufri di dicho ‘disturbio’, cu por tin consecuencianan pa nan funcionamento normal. Y kico profesionalnan por haci pa atende y anda cu Syndroom di Apneu.
Dokter Joan Werleman (DDS) a nace na Aruba di un linahe di profesionalnan relaciona cu cuido di salud, pasiona cu e forma vital di hala rosea.
Su bisawela, Johana Catharina Geerman, tabata un nurse-partera na comienso di siglo 20 y a yuda hopi baby nace saludabel y hala nan prome rosea.
Su mama, Graciela ‘Baby’ Werleman, un enfermera-anestesista cu durante 43 aña a traha y atende su pashentnan relaciona cu respiracion bou anestecia general.
Dokter Joan Werleman na edad di 18 aña a bay Merca pa studia pa dentista y a gradua na University of Maryland School of Dentistry na 1992.
Na 2015 Joan Werleman tabatin deseo pa adkiri mas conocemento pa di e forma ey provee cuido excelente na su pashentnan. El a cuminsa un programa di ‘Dental Sleep Medicine’ na Tufts University School of Dental Medicine. Su pasion pa medicina dental relaciona cu ‘drumi miho’ ta e resultado di su amor pa studia pa bida largo y obtene experiencia extensivo, profundo y amplio pa e por garantisa cambio den bida di su pashentnan y yuda nan descubri e poder di un bon soño.
Entrada pa dia 2 di mei ta gratis.
ORANJESTAD – Un biaha mas, un blaas di helium, tabata e causa di un interupcion di coriente awe tardi pa 5:44 pm. Ta trata di e barionan di Sabana Blanco,Primavera,Paradera,Rooi Afo y vecindario. Na momento cu e techniconan di Elmar a yega, a cuminsa traha mesora riba identificacion di e causa cu a ocasiona e storing aki .A bin descubri cu e causa di e storing aki tawata un blaas di helium. Pa 6:30 pm awe tardi ELMAR a logra restablece coriente pa tur e areanan afecta.
ORANJESTAD – Awe nochi Alto Comisario di polis Ramon Arnhem ta invitado di e programa Noticiacla LIVE. Durante e programa aki, e moderador y periodista Tito Laclé lo confronta e Alto COmisario cu varios tema skerpi, relevante y actual riba e tereno policial. Fuera di esaki, e audiencia tambe por haci pregunta durante e programa, via e pagina di Facebook di Noticiacla y nos lo haci e preguntanan aki tambe si nan ta relevante. Esaki no ta e prome biaha cu sr Arnhem ta bin. Bo por ta sigur cu hopi informacion balioso por sali for di e programa aki, cu manera semper, ta bira noticia nacional despues. E programa ta cuminsa pa 9’or di anochi, ta en bibo y lo pasa riba plataformanan di Noticiacla manera e Facebook page, Website y App.
ORANJESTAD – Den cuadro di e spirito di e proximo olimpiada na Paris, Francia, oficina di turismo di Aruba (ATA) a organisa su propio ‘weganan di verano’ e asina yama ‘Relaxathon. Pa esaki nan a uni forza cu un e 5 biaha atleta olimpico Shaun White, cu lo fungi como anfitrion di e prome evento Caribense di e tipo aki. E intencion ta pa atrae participantenan (turista) di tur parti di mundo pa bin beach di Aruba, y aplica nan capacidad pa relax, y bira e miho relaxer di mundo’.
ORANJESTAD - Dia 8 di mei 2024 Parlamento di Aruba lo trata e proposicion di ley pa legalisa matrimonio di mesun sexo. Segun e grupo di iglesianan Cristian di Aruba, tin indicacionnan fuerte cu mayoria di pueblo di Aruba kier mantene matrimonio den nos codigo civil como un union serio y sagrado entre un homber y un muhe. Si nos Parlamentarionan tene nan mes na e decision di Corte Europeo pa Derecho Humano anto nan lo yega na e conclusion cu no ta existi derecho humano pa hende casa cu un persona di mesun sexo. Legalisa matrimonio di mesun sexo kiermen ta duna un fabor na e personanan aki. Pero ley no mester ta basa riba fabor sino riba derecho. Parlamento no mester inventa un derecho cu no ta existi.