Aruba ta co-anfitrion di Torneo futbol Damas U15 Concacaf cu Trinidad y Costa Rica

MIAMI/ ORANJESTAD – Pa prome biaha den historia, Aruba ta co-anfitrion di e torneo Damas U15 di Concacaf. Asina a keda anuncia na Miami diahuebs ultimo. E weganan lo tuma lugar entre 5 y 11 di augustus 2024. Aruba lo ta anfitrion di e liga C, Trinidad Liga B y Costa Rica A. Un total di 35 pais miembro a informa cu nan ta interesa pa participa den e weganan aki. Tur tres liga lo inclui un parti di grupo y un parti di knockout y corona su campeon. E cantidad di ekipo pa liga lo keda deterina basa riba e ranking di Concacaf Woman’s U-17 Ranking di maart 2024 y e number final di participante. 

AVB

 Segun e federacion nacional di futbol di Aruba AVB, esaki ta un momento historico cu ta marca nos dedicacion, nos pasion y nos talento riba e tarima internacional.

“Keda pendiente mientras nos ta cuminsa un aventura nobo increibel, ban uni den nos amor pa futbol y nos compromiso pa excelencia. Ban mustra mundo cu chikito y simpel nos por ta, pero si respeta!” e federacion a bisa riba su pagina di Facebook.