Faarup: Trahadonan Radisson mester keda trankil pa awo

ORANJESTAD – Trahadonan di Radisson Hotel tin cu keda trankil te ora cu tin mas claridad riba nan situacion. Un di e abogado cu ta asisti e sindicato FTA, -esta Swen Faarup, a bisa NoticiaCla.com cu e reunion cu e trahadonan diahuebs na Radisson tabata pa trankilisa e inquietudnan cu tabatin. Sinembargo mucho cos no por a bisa, pasobra no tin mucho claridad. Claridad p.e. riba kico ta pasa cu e hotel no tey ainda te despues di e sentencia den caso Aruba Growth Fund y Carlson Group. Prome cu esey, ta speculacion so tin. Y tur cos cu bisa awor, por cambia despues di e sentencia.

RETIRO OF NO?

“Nos tin entendi cu e intencion di banda di e hotel ta, cu ningun trahado lo no mester bay (cas) . Y nos punto di salida en todo caso ta bay ta, pa e trahadonan tur mantene nan trabou” Faarup a sigui bisa. “Despues di e sentencia, nos lo reuni atrobe cu e trahadonan”. Di parti di e sindicato mes, a splica e trahadonan basicamente mescos.

RUMORNAN

Durante e reunion entre e sindicato y representantenan di RIU, a compronde cu e deal ta cla caba. Tin te hasta informacion cu pa 1 di juli, e nomber di RIU mester ta riba e edificio cu awo ta di Radisson ainda, cu e trahadonan ta keda cu nan trabou, y cu e hotel ta bira un all-inclusive. “E informacion ey ta nobo pami” Faarup a bisa. Algun trahado di Radisson, a splica cu ta esey nan a wordo informa door di e gerente di e hotel. Nan kier a keda anonimo pa miedo di represaya pa nan trabou. Foto: Swen Faarup para mei mei di presidente di sindicato FTA, Hubert Dirkz y abogado mr Pietersz.