Croes: Por lo pronto Setar no tin pensa di ofrece Apple Watch

ORANJESTAD – Pa esnan cu ta wardando pa un Apple Watch, nan tin cu warda un poco mas. Por lo menos, no serca Setar. Esey ta pasobra, segun su director  Roland Croes a splica NoticiaCla.com, e compania local di telecomunicacion no a dicidi si ta buske ainda of no.”E decision ey no ta tuma ainda”, Croes a bisa. Tin solamente un deal ainda entre Setar y Apple pa bende iPhone, pero no Apple Watch. Como tal pa aworaki, no spera cu Setar lo tin e tipo di holoshinan aki por lo pronto. Ta obvio cu hendenan por busca esaki di un otro forma, esta cumpre nan mes na Merca y posiblemente use na Aruba. Pero por lo menos via Setar, lo no tin e posibilidad ‘ainda’ pa cumpra uno. E director no a bisa ainda si nan lo evalua, ni si esaki ta e caso, pa ki tempo esey lo ta.

ENFOKE RIBA IPHONE

Pa aworaki, e unico aparatonan Apple cu tin, ta e iPhone y den esey si lo keda suministra mas modelo segun nan keda presenta. Contrario na otro companianan, pa Setar por haci un tipo di benta asina, nan tin cu cana tur e canalnan legal y corporativo, sera dealnan grandi pa asina garantisa e calidad cu e producto merece , pero mas importante, e cliente. Pesey ta tarda algun tempo, ora cu cierto productonan keda lansa internacionalmente, y e tempo cu e ta dura pa e yega Aruba, of den e caso aki Setar. Pero unabes cu e wordo ofreci, tin e garantia cu e ta conta cu e sosten completo di backup y servicio di tanto Setar como Apple.