St. Maarten tambe ta boga pa saca formashon di gobierno for di man di gobernador

W’STAD/PHILIPSBURG - Formashon di gobièrnu inkluso nombramentu di minister mester ta den man di parlamento i no di gobernadó, meskos ku ta e kaso na Hulanda. Asina presidente di parlamento di St. Maarten, Sarah Wescot-Williams a trese dilanti durante un konferensia di prensa. A yama e konferensia di prensa riba preokupashon ku ta biba na St. Maarten riba proseso di screening i nombramentu di minister.

E proseso ta dura demasiado largu i ta kousa un situashon kaminda pa un periodo largu tin miembro di parlamento ku ta alabes minister demishonario. Konforme konstitushon di St. Maarten tabatin te 10 mei awor pa a nombra un gobièrnu. Despues di e fecha aki e parlamentarionan ku tabata alabes minister demishonario mester baha.

Ta trata di promé minister demishonario Sylveria Jacobs, Minister di Finansa demishonario Ardwell Irion, Minister di Bibienda Popular i Obranan Públiko, Egbert Doran i minister di Salubridat Públiko demishonario, Omar Ottley. Ta pa e motibu aki Wescot-Williams a bisa ku na su opinion e enfoke di proseso di formashon mester ta pa yega mas lihé posibel na nombramentu di ministernan.

E ta spera tambe ku pa ta logra pa e fecha tentativo di 25 aprel awor ku tur e ministernan nobo ta hura, despues ku formadó Luc Mercelina a entregá su relato final di e proseso di screening na gobernadó. Wescot-Williams ku ta presidente di parlamento di St. Maarten ta bisa ku e ta kouteloso den su espektativa ku e ministernan nobo ta hura e siman aki pasobra e proseso no ta den su man.

“Mi no tin influensia riba e proseso. Mi ta mantené mi mes na e fecha, pero miéntras mi no haña un invitashon pa ta presente na e seremonia di huramentu mi ta keda kouteloso.”

Mas aleu el a bisa ku e proseso di screening di e kandidatonan pa minister no ta transparente i mester duna mas informashon na poblashon di St. Maarten i e kandidatonan mes ku tin ku pasa den e proseso aki. Na St. Maarten, meskos ku ta e kaso na Kòrsou, ta gobernadó ta esun ku na enkargo di e proseso di formashon, screening i nombramentu di minister.

Segun Wescot-Williams ta splika e enkargo aki ta konforme kon e proseso di formashon tabata tuma lugá na Hulanda, pero for di mas ku 10 aña pasá e proseso aki a kambia na Hulanda i e enfoke di e proseso di formashon ta serka polítika. “E proseso di formashon i nombramentu di minister ta serka parlamento “Tweede Kamer”.

Wescot-Williams ta di opinion ku si e proseso di formashon i nombramentu di minister ta kai direktamente bou di parlamento esaki lo krea e diskushonnan públiko ku ta saludabel pa e proseso. Pa e motibu aki e ta na fabor pa trese kambio a base di kon e proseso di formashon a evolushoná durante di añanan.

Relashoná ku e proseso di screening Wescot-Williams ta bisa ku esaki ta tuma lugá a base di un lei ku a pasa na 2012. Tambe tin un lei ku ta regulá integridat di minister ku ora ku e minister asumí su funshon.

Wescot-Williams ta kere ku ta mihó ku tin un solo lei ku ta regulá e proseso di screening di kandidatonan pa bira minister i alabes e integridat di minister unabes ku e ta den funshon. E ta mustra kon na Kòrsou tambe a inkorporá ámbos asuntu den un solo lei i ta kere ku esei ta loke St. Maarten tambe tin ku hasi.”

Finalmente e presidente di parlamento ta bisa ku na St. Maarten e warda demasiado largu pa e gobièrnu nobo por tuma asiento. Na su opinion no por kompará e situashon na St. Maarten ku esun na Hulanda.

Na Hulanda a tene elekshon for di novèmber 2023 i ainda no tin un gobièrnu nobo. Na Hulanda sinembargo tin e situashon ku ainda partidonan no a haña otro riba formashon di un gobièrnu nobo miéntras ku na St. Maarten tin un akuerdo riba puntonan prinsipal pa e próksimo periodo di gobernashon. NOTA: Texto ta scirbi den Papiamento fonetico di Corsou.