Colegio di supervision financiero tin secretario nobo

WILLEMSTAD - Entrante dia 1e di augustus 2015 Señor Kees van Nieuwamerongen lo retira como secretario di Colegio di Supervision Financiero (Cft). E mesun fecha ey Señor Manus Twisk lo bira su succesor. Manus Twisk tin amplio experiencia riba tereno di Finansa Publico. El a yega di traha na Ministerio di Finansa di Hulanda y na e municipionan di Rotterdam y Amsterdam. Na Municipio di Amsterdam e tabata responsabel pa e cartera completo di Finansa. Na Rotterdam, na prome instancia, como Hefe di Asunto di Presupuesto, e tabata responsabel pa maneho financiero, y planificacion y control di e municipio; den un funcion posterior e tabata Hefe di Maneho di Empresa/Controlado na Empresa di Desaroyo di Rotterdam (asunto di tereno, propiedad inmóvil i economia). Señor Twisk lo fungi te meimey di aña como secretario di e Comision Rinnooy Kan. Asociacion di Municipionan Hulandes (V.N.G.) a institui e Comision ‘Espacio Financiero pa Municipionan’, cu tin como tarea presenta proposicion tocante innovacion den finansa municipal, cualnan lo mester contribui na mas flexibilidad (entre otro pa medio di ampliacion di e zona fiscal local) y na crecemento economico. Esakinan ta asunto cu tambe ta di sumo actualidad pa e parti Caribense di Reino Hulandes. Kees van Nieuwamerongen a fungi como secretario di Cft for di juli 2011. E tabata estrechamente envolvi den constitucion di e supervision financiero y como secretario di Colegio di Supervision Financiero (Cft) el a contribui na asesoramento di e Gobiernonan di Corsou y di Sint Maarten y di e Colegionan Ehecutivo di e parti Caribense di Hulanda. Durante e prome mita di luna di augustus e secretario sucesor Manus Twisk lo presenta su mes na e gobiernonan di e paisnan y na e entidadnan publico.