Oduber: Maneho nobo pa haya permiso pa hotel; Ta permiti solamente Boutique hotels!

ORANJESTAD – Desde awor en adelante, gobiero ta duna permiso solamente pa traha boutique hotel, vs cualkier otro tipo di hotel. Minister Dangui Oduber diamars a anuncia cu a introduci e maneho nobo di otorgamento pa permiso di hotel den cuadro di turismo sostenibel. “E maneho aki ta tene na cuenta cu Aruba no por sigui crece na e velocidad cu e ta bayendo y mester tuma accionan concreto pa frena e cantidad di cambernan cu ainda lo mester construe”.

POSIBEL CASO DEN CORTE AWOR 

Ora cu Noticiacla a puntra e mandatario despues kico exactamente esaki ta nifica, e mandatario a splica cu ‘si por ehempel bo tin derecho pa construi 600 camber e maneho ta permiti solamente boutique hotels’. Ademas, e minister a sigui splica e portal aki cu ‘tur desaroyado di hotel cu tin sea un erfpacht of permiso di construccion mester tene cuenta cu e maneho nobo aki!”. E mandatario ta conciente cu e maneho aki por crea malcontento cu desaroyadornan cu ya caba tabatin otro plan, y cu esaki por resulta den casonan den corte. “Si, nos por spera casonan legal y ta prepara pa esaki. Nos ta sinti cu nos tin argumentonan valido pa hustifica y sostene e maneho” Oduber a sigui bisa Noticiacla. 

ENFOKE TA DIFERENTE

E maneho segun e minister su splicacion ta 

* Enfoca riba calidad y no cantidad

* Enfoca riba turismo sostenibel

* Reduccion di camber cu nunca no a wordo construi

* Solamente boutique hotels lo haya permiso

GABINETE BERDE

E ta ripiti cu e gabinete di signatura berde a permiti mas di 7 mil camber extra, mientras cu no tin lugar. Algo cu segun e mandatario actual, ta cambiando desde 2017 esta, un maneho di “High-Value, Low-Impact Tourism”.

PAKICO E CAMBIO

E motibo tras di e cambio di maneho segun Oduber, ta varios. Entre nan tin:

 * Tin un escasez di trahado unda cu Aruba lo mester imigra hende di afo.

* Imigra hende di afo tambe ta trece su retonan manera:

o No tin suficiente vivienda pa nos localnan.

o No tin suficiente scol pa nos muchanan.

o Infrastructura no ta diseña pa tin tanto auto ariba caminda.

OPOSICION DEN PARLAMENTO

Segun e mandatario, oposicion awendia ta criticando cu Aruba no por sigui accepta construccion di mas hotel. “Oposicion cu tin varios ex-miembronan di partido AVP cu a sostene e maneho di parti tereno pa loco. E tempo ey tur tawata keto y a aproba tur e cambernan extra aki. Si nan tawata tin e curashi e tempo ey, di vocifera nan mes, awe nos no ta den e situacion aki”.

GERLIEN CROES TA REACCIONA

Un di e parlamentarionan cu a reacciona casi mesora despues di e comunicado di minister Oduber, tabata e parlamentario independiente Gerlien Croes: “Awor cu e baca a hoga caba, diripiente despues di casi 7 aña cu nan ta goberna y cu e preguntanan a sali pa e Minister President cu ta esun encarga, gobierno ta anuncia maneho nobo di otorgamento di permiso pa hotel” parlamentario Croes a duna di conoce.