SETAR: Opcion pa cambia di ADSL pa Cabelnet

ORANJETAD - Setar su director Roland Croes a informa awe cu lo inicia cu e proyecto di cambio di Internet cu lo ta posibel pa tur cas na Aruba. Un condicion pa e cliente por haya e speed mas halto aki ta cu e cliente mester ta abona tambe riba e servicio di Cable TV di SETAR. E cliente cu no ta desea esey lo por scohe pa keda cu su servicio di ADSL. E proyecto aki cu ta encera pasamento di clientenan di ADSL pa Cablenet lo no tin ningun gasto adicional pa e cliente di SETAR. Naturalmente cu un proyecto di tal magnitud cu ta cubri henter Aruba cu ta interesa den haci e cambio pa Cablenet lo mester bay den fase. SETAR lo yama cada cliente pa haci un cita pa por realisa e cambio. Pues lo dura varios luna pero na final tur cas na Aruba lo tin speednan mas halto ainda.

HOMENETWORKING

Siguiendo desaroyonan tecnologico nos por conclui cu e cas di futuro lo ta uno hopi bon conecta y riba speednan halto. E asina yama Home Networking ta e siguiente trend cu SETAR lo concentra ariba. SETAR lo ta un pionero den e tereno aki haciendo uso di e ultimo tecnologia di WiFi. SETAR lo pasa tur cas na Aruba y na mes momento clientenan cu ta desea pa nan tin e servicio adicional di WiFi den full nan cas por probecha y consulta cu e tecniconan di SETAR di biaha. E tecnico di SETAR lo por duna informacion y prijs correspondiente pa e cobertura di internet pa e residencia. E instalacion di e WiFi extendernan aki cu ta di e ultimo tecnologia ta keda haci di biaha hunto cu e cambio di ADSL pa Cablenet pa e cas.

SPEED MAS HALTO

Segun Croes, ya tin un grupo di clientenan di SETAR cu a nota un aceleracion den nan speed di Internet y den e proximo lunanan mas y mas lo nota e cambionan cu SETAR a bin ta trahando riba dje. Pa prome bes, residentenan di Aruba lo experencia speednan mas halto ainda via Cablenet, nos ta referi aki na speednan cuminsando di 30 Mbps download. Como pionero di Internet di Aruba SETAR semper a keda tur ora ta modernisa equiponan y hermentnan necesario pa por sigui brinda Aruba den tur sector e servicio excelente di internet awendia. Na final di e Proyecto di cambio di ADSL pa Cablenet tur cas na Aruba lo por disfruta di speednan mas halto ainda.