Croes: Aruba mester di 9000 trahado e aña aki pa hotelnan nobo!

ORANJESTAD – Un declaracion cu minister di Labor Glenbert Croes a haci dialuna atardi via un comunicado di dje, a hala atencion den dialuna atardi relaciona cu e tema di labor den sector hotelero. Esaki pasobra e la declara den e comunicado textualmente cu ‘manera ya ta conoci, e aña aki lo tin 3000 camber di hotel adicional ta habri’. Pero e declaracion cu mas a hala atencion ta e hecho cu segun e mandatario “  Ta bay tin mester di por lo menos 9000 trahado pa e hotelnan aki por opera y duna e servicio optimal cu nan ta desea”. Esey tambe ta un citado directo di e comunicado. Y e mandatario ta cita ‘ segun indicacion inicial’. Mester bisa si mesora cu e base di e comunicado tabata pa anuncia cu ta bay tin un job fair pa pensionado y persona di 45+. Y ta den e comunicado, e informacion ariba menciona ta aparece tambe. 

AHATA

Tabata algun siman atras den un entrevista den e programa Noticiacla LIVE, e CEO di AHATA Tisa LaSorte a bisa cu pa e aña aki, lo tin mester di 1500 trahado pa hotelnan cu ta habri e aña aki. Pues un cifra 5 biaha mas grandi cu AHATA ta raporta. No ta conoci kico ta e indicador cu e mandatario di labor ta usando den e caso aki.  Pues e declaracion di e minister ta un diferencia hopi grandi compara cu loke e asosacion hotelero ta bisando. Con bin e diferencia ta asina grandi, mester wak, sigur pa sa unda e minister a saca e informacion aki, y con e calculacion aki ta haci. Hecho ta si, cu si ta 1800 of 9000, Aruba mester di hopi trahado e añanan siguiente, pa por cumpli cu e demanda di tur loke ta biniendo na camber nobo y tambe e spinof indirecto di esaki.