Mas chens pa alumno MAVO drenta HAVO

ORANJESTAD – Colegio Arubano ta duna alumnonan di MAVO un chens mas pa bay HAVO. Den un carta cu nan a manda awe pa tur scolnan MAVO, e rector di school, ta splica cu ,-aunke cu nan ta mantene e regla menciona di tin un promedio di 7.5 pa tur punto pa por garantisa un cupo,- nan ta dispuesto pa baha e norma un tiki, dunando un otro grupo tambe un chens.

GRUPO LIMITA

Ta trata di un grupo limita di alumno di MAVO cu ta net bou di e promedio ey, y ta considera como ‘bespreekgeval’, osea un caso discutibel. Nan por haya un entrada, si e comision di admision di entrada permiti esaki. Pero pa por bin na remarke, e mester tin un total di 29 punto total di e asina yama lesnan profil, y mester haya un cifra di 6 pa hulandes y 6 pa engels, osea ingles. Esey ta nifica cu e alumno lo haya un promedio di 7.25, y cu asina, posiblemente por drenta e scol.

GUIA EXTRA

E grupo di alumno cu ta drenta via Colegio via e forma aki, ta wordo poni den un klas regular di H4. Nan lo bin si, na remarke pa un guia extra. E peticion pa e facilidad extra aki, lo keda entrega proximamente serca e mandatario di enseñansa. Colegio ta spera cu asina e cantidad di alumno di MAVO cu kier y por bay HAVO, ta aumenta.

REGLA NORMAL

E regla normal, sinembargo ta keda manteni, esta cu tur alumno di MAVO cu kier drenta HAVO normalmente, mester tin un promedio di 30 punto, osea un cifra promedio di 7.5. Cu e ‘adaptacion’ nobo aki, Colegio kier sali for di e impasse cu tin aworaki cu gobierno di Aruba, riba admision di scol.