E careda di ciclista ‘12 Hours di Aruba’ ta bolbe na 2024!

ORANJESTAD - E tenshon ta subiendo mientras e edicion di 2024 di 12 Hours di Aruba ta acercando. Riba djasabra 20 di april, participantenan entusiasta di entre otro Aruba, Curaçao, Bonaire i Hulanda ta reuni na Sero Cristal pa un di e eventonan mas emocionante den e region. Cu un mescla di adrenalina, team spirit i pa un bon causa, e evento internacional aki organisa pa FX Hubada ta promete pa ta un espectáculo cu ningun hende kier perde.

E evento ta cuminsa riba diabierna 19 di april cu e Strider Competition na 18:00 or, unda e corredornan mas hoben ta haya e oportunidat pa mustra nan habilidad riba un pista adapta. Mas laat na anochi, durante e inscripcion di e teamnan, tambe e kapitan di team i voluntarionan ta haya informacion durante un briefing di seguridad.

Riba djasabra 20 di april e evento ta bayendo na velocidad pleno cu e prome edicion di e Kids Mountain Bike Race, cu ta cuminsa na 07:30 or. Muchanan entre 5 i 13 aña lo lucha den dos categoria di edat riba un pista specialmente disenjá, posibel gracias na Tri-Bike Aruba.

Na 12:00 or merdia, e climax di e dia ta cuminsa, e 12 Hours di Aruba. Mas cu 50 team lo tuma e reto pa un periodo di doce ora riba e pista, reparti den team di homber, muhe i mixto. E pista ta traha cu cuido pa brinda un experiencia espectacular pa tur e participantenan.

E evento no ta solamente caracterisa pa prestacion deportivo, pero tambe pa entretenimento musical. For di 19:00 te cu 23:00 or, e banda HAERFEN lo entretene e publico, mientras cu DJ Ayrton Anthony, DJ Armando, DJ Roger Dutch i DJ Dillon ta pone e ambiente festivo.