Airport Business: Aeropuerto Aruba esun mas inovativo di mundo

ORANJESTAD – E aeropuerto di Aruba a haya e puesto di honor di Airport Business como e number uno den inovacion pa 2015. E proyecto di happy flow, a logra pone Aruba literalmente riba mapa, y awe e revista Airport Business ta confirma esey. Aruba ta prome cu te hasta Schiphol, Abu Dhabi y Paris, pa ora cu ta papia di inovacion mundial. Segun e revista, revisando e prome 6 luna di aña, nan ta revista e lista di invencion y creatividad cu ta diseña pa yuda biaheronan probecha lo maximo di nan tempo na e aeropuerto y tambe mehora e experiencia general di e biahero.

SCORE HALTO

Den esaki, e proyecto Happy Flow a logra score hopi halto mes segun e revista, ubicando e te na number 1. E revista ta repasa e proyecto cu su posibilidad biometrico pa identifica e persona na e varios punto di chekeo na e aeropuerto. E revista ta splica e proyecto y con e ta funciona y ken tur ta envolvi den e proyecto. E proyecto, manera ta conoci, a keda lansa siman pasa y ta e prome na mundo pa logra identifica e pasahero via e proceso biometrico, (uso di wowo) pa facilita su chekeo y resto di proceso pa su buelo. Mira e lista completo di e revista aki.