Na Corsou tin 4300 cas di famia sin suministro di awa

WILLEMSTAD - E frakshon di MFK ta hopi preokupá ku kasnan ku no tin suministro ainda di awa. P’esei nan ke un reunion públiko, kaminda ta invitá minister Ruthmilda Larmonie-Cecilia i su kolega minister Ruisandro Cijnte pa ta den sala di parlamento i asina debatí ku nan riba e tópiko aki.

Relashoná ku e petishon pa e reunion públiko aki, e frakshon ta bisa ku na e momentu aki tin un kantidat grandi di famia sin konekshon di suministro di awa. Sifra ku nan di frakshon di MFK ta dispone ta indiká ku e total di mas òf ménos di kas ku no ta konektá ku suministro di awa ta 4300 kas. Ta trata di kasnan di famianan di kual e mayoria tin un entrada mensual hopi abou.

E frakshon ta bisa ku ta hopi bon na altura di e situashon, en parti pa motibu ku mensualmente e frakshon ta den e barionan, ta duna nan un bon bista di e kantidat di kasnan sin suministro di awa. Pero tambe e ta duna e frakshon un bista riba e estado finansiero di kada kas. Loke ku frakshon di MFK por konkluí ta ku e situashon aki ta rekerí atenshon pura di parlamento.

Parlamento a aprobá den presupuesto di 2024 un oumento pa e supsidio ku ministerio di SOAW ta duna pa entre otro suministro di awa.

Den práktika e proseso pa risibí e supsidio aki ta kana lento, i banda di esaki e depósito ankrá den e maneho interno di Aqualectra N.V. pa konektá kuenta ku a keda será ta muchu haltu ku ta pone ku e kliente no por kumpli kuné.

Na aña 1993, Nashonnan Uní a proklamá e fecha di 22 di mart komo dia mundial di awa i ta konsiderá ku awa ta un di e produktonan primordial i vital pa salú di hende, konsiderando ku mas òf ménos 60% di kurpa humano ta konsistí di awa. Korte hulandes tambe ta reafirmá esaki prohibiendo kompanianan di utilidat pa deskonektá suministro di awa na kasnan di famia ku menor di edat.

E frakshon ta kere ku mester formulá un maneho basá riba e metanan di desaroyo sostenibel “SDG” ku ta tene kuenta ku estado sosial, pero tambe salú di e siudadano.

P’esei MFK ke e reunion públiko i pa deliberá huntu ku ministernan Cijntje i Larmonie-Cecilia. NOTA: Texto ta scirbi den Papiamento fonetico di Corsou.