Simulacro pa atende explosion di boiler na WEB

ORANJESTAD – Clientenan cu a bishita nos compania di awa por a nota hopi movecion in usual riba tereno di WEB. A nota ambulance ta core y hasta helicopter ta bula. A resulta cu ta trata di un simulacion di un explosion na un di e boilernan di WEB. E explosion a ocasiona heridonan cual mester a evacua mas lihe posibel pa haya asistencia medico. ‘E simulacro aki ta forma parti di nos preparacion pa temporada di horcan’. Asina commandant Jan ten Hove di Marinierskazerne Savaneta a informa. Mariniernan hunto cu personal di e team di emergencia di WEB Aruba, personal di Ambulance Dienst y boluntarionan di Rode Kruis Aruba durante e simulacro a haya e oportunidad pa train tur e facetanan di emergencia den caso di un calamidad.

SIMULACRO

Ta importante pa organisa un simulacro manera esun aki regularmente. Segun commandant Jan ten Hove, e motibo pa esaki ta cu banda di e palabracionnan y deliberacionnan necesario, un ehercicio ta e manera adecua pa mira kico ta bay bon y eventualmente por mehora. Asina ta prepara pa na momento cu realmente un incidente of calamidad grandi presenta, por brinda e mihor ayudo posibel. E ehercicio aki ta necesario pa siña di otro y pa asina por asisti otro. ‘P’esey no ta por nada cu asistencia na autoridadnan civil ta un di nos tareanan principal!’, asina Ten Hove ta expresa.

WEB

Di parti di WEB, hefe di Security señor Rubio Romero tawata encarga cu preparacion interno di e simulacro. E preparacion a nifica informa e diferente departamentonan di e simulacro y prepara e condicionnan pa seguridad di tur esnan envolvi. Tambe tawata envolvi e WEB Emergency Team, mihor conoci como WET, bou coordinacion di sr. Glenn Rock, Safety Coordinator di WEB. Sr. Rock a indica cu e ta hopi contento cu e iniciativa di Marinierskazerne. ‘Un simulacro al estilo ta mantene empleadonan di WEB altanto di e facetanan di emergencia, pero principalmente e ta train nan con pa trata casonan di emergencia hunto cu otro gruponan di emergencia na Aruba. Y mas tanto nos train, mas mihor nos ta prepara pa posibel calamidad den futuro.’, asina señor Rock a finalisa.

GRADICIMENTO

Ta extende un palabra di gradicimento na tur e gruponan di emergencia envolvi, pero tambe pa e comprension di e publico cu tawata presente na momento di e simulacro.