InselAir: Ta ofrece e red di conectividad mas grandi for di Aruba

ORANJESTAD – InselAir Aruba awe a lansa nan plan pa 2015 y a repasa nan logronan te cu awo. E compania a y ta hasi inversion grandi den desaroyo di mercadonan cu lo resulta den 8 rutanan non-stop pa e aña akinan. Como tal tabata necesario pa duna cobertura na tur e desaroyonan aki. Entre nan, manera cu noticiacla.com a relata anteriormente awe , 9 ruta nobo den un aña di tempo.

RUTANAN NOBO

Segun e CEO di e compania, Frederick Nuboer, for di cuminsamento di Juli, 2015, e rutanan di San Juan, Santo Domingo y Medellin lo wordo añadi na e destinacionnan directo for di Aruba y lo continua cu Barranquilla, Bucaramanga, Cali, Quito y Havana mas laat e aña aki. E ruta di St. Maarten lo wordo opera via Sto. Domingo tambe for di 1 di Juli. Pa fin di 2015 InselAir Aruba lo ofrece na publico un total di 17 destinacionnan non-stop for di Aruba cual ta suma mas cu cualkier otro airline cu ta sirbi Aruba hunto. InselAir Aruba tambe ta ofrece un averahe di 12 buelo pa dia, cual ta hasi di InselAir e airline cu mas ta carga pasahero pa y for di Aruba y cu ta representa un 18% di e total biaheronan pa y for di Aruba. For di e hub di ABC InselAir ta ofrece 27 destinacionnan, 40 ruta y 180 city-pairs cual ta hasi di InselAir e airline mas grandi basa den Caribe.

E AIRLINE MAS GRANDI. INVERSIONAN MAS GRANDI.

Nuboer, a enfatiza e importancia di InselAir Aruba como un airline local: “Airline nan di afo no ta emplea asina tanto trahado directamente manera InselAir Aruba ta hasi, no ta cumpra asina hopi parts y lubricantenan localmente y no ta paga miyonan den tax nan, pa duna djis un par di ehempel”. “Tambe como un airline local, InselAir Aruba ta inverti fuertemente pa educa su staff(cual ta capital intelectual) y equipo; InselAir a cumpra 8 avion den 2 aña di tempo na e suma di AWG 40 million” Nuboer a sigui bisa.

TA ENFOCA DEN AMERICA LATINA

InselAir Aruba su red ta cubri awor 40 ruta den Caribe, America Latina y Merca, usando 19 avion. Segun Nuboer, un di e rasonnan cu InselAir Aruba a crece ta e forma estrategico cu e islanan ABC ta localisa den Caribe cual ta ofrece e oportunidad pa duna servicio na Sur America y Este di Merca mihor cu cualquier otro isla den Caribe. “Pa e motibo aki, InselAir Aruba por ofrece coneccionnan mas facil y mas corto cu cualquier otro airline. Si nos mira otro lugarnan geografico y enfoca den Caribe, nos por mira mesora e ventaha cu InselAir Aruba tin. Nos rutanan ta semper mas of menos den un linea straight compara cu otronan”, Nuboer a splica. E futuro di e islanan ABC por wordo haya den America Latino su turismo y comercio. Nuboer a sigui bisa: “For di Sur America pa Caribe nos ta experencia e tendencia di aumento mas rapido y for di Sur America pa Norte America ta e di e 2 aumento mas rapido. Pa tur dos tendencia, InselAir Aruba ta perfectamente posiciona pa transporta e number mas grandi di pasahero di y pa nan destinacion.” E rutanan cu InselAir Aruba ta cuminsa cu nan, mayoria di caso ta den mercadonan cu tin un crecemento economico balanza. “Lo cual hende ta hasi ora cu ta experiencia un crecemento di entrada promer ta cumpra un auto nobo y djei cuminsa biaha. Tambe ora di mira estadisticanan di e poder di gasto di hende, por mira cu InselAir Aruba ta trece pasaheronan Aruba cu ta gasta significativamente manera ta e caso di Republica Domincana y Venezuela,” segun Nuboer.

ESTRATEGIA Y CAMPANJANAN

Pa concientisa tur Mercado di e posibilidadnan numeroso dentro di e red di servicio di InselAir, a cuminsa cu un campaña di AWG. 1.000.000 na e 27 destinacionnan cu e ta opera. Canalnan cu ta wordo usa ta TV, radio, online marketing, eventonan local, social media y direct email. “No solamente nos ta opera destinonan nobo y opera cu mas frecuencia, tambe nos a crea un red di conectividad entre e destinonan cu ta existi” – Nuboer a termina bisando.